САД беа најголемиот донатор на СЗО, која заминувањето на Вашингтон и неговото одбивање да плати членарина за 2024 и 2025 година ја доведоа во сериозни финансиски тешкотии.
„Ги повикувам министрите за здравство низ светот и СЗО нашето повлекување од таа организација да го сфатат како повик на будење“, кажа Кенеди во видео-порака и додаде дека САД „веќе ги контактирале истомислениците и ги охрабруваат другите да размислат да им се придружат“.
Кенеди, долгогодишен критичар на СЗО и критичар на големите фармацевтски компании, во таа порака Собранието на СЗО, кое заседава во Женева, го нарече „надмена и умирачка“ организација која е „под претерано влијание на Кина“, на родовата идеологија и фармацевтската индустрија.
„СЗО е заглавена во прекумерна бирократија, вкоренети парадигми, конфликт на интереси и меѓународни игри на моќ“, кажа Кенеди и додаде дека сака меѓународната соработка во здравството да ја ослободи „од оковите на политичкото мешање и коруптивните влијанија“.
Кенеди оцени дека приоритетите на СЗО „сè повеќе ги одразуваат предрасудите и интересите“ на медицинските компании, но и дека СЗО „премногу често дозволувала политички прашања, како промоција на штетна идеологија, да ја одвратат од нејзината основна мисија“.
По враќањето во Белата куќа во јануари претседателот Доналд Трамп го почна едногодишниот процес со кој САД ќе ја напуштат СЗО.
