Членовите на Меѓународната поморска организација (ММО) се подготвени во октомври да разгледаат усвојување на нови обврзувачки регулативи за намалување на емисиите на стакленички гасови во поморската индустрија. Претседателот Доналд Трамп изјави дека неговата влада нема да прифати никаков меѓународен договор за животна средина што неоправдано или неправедно ги оптоварува Соединетите Американски Држави и им штети на интересите на американскиот народ.
Во заедничка изјава, државниот секретар Марко Рубио, секретарот за трговија Хауард Лутник, секретарот за енергетика Крис Рајт и секретарот за транспорт Шон Дафи изјавија дека предложената рамка всушност е глобален данок на јаглерод врз Американците, кој „неодговорните“ Обединети нации сакаат да го наметнат.
„Новите глобални стандарди за гориво би барале употреба на скапо, помалку достапно гориво, фаворизирајќи ја Кина. Овие стандарди, исто така, би ја исклучиле употребата на докажани технологии што ги напојуваат глобалните бродски флоти, вклучувајќи опции за гориво со пониски емисии во кои американската индустрија е лидер, како што се течниот природен гас и биогоривата.
Според таа рамка, бродовите ќе мора да плаќаат такси за неисполнување на недостижните стандарди за гориво и квотите за емисии на стакленички гасови. Овие такси ќе ги зголемат трошоците за енергија, транспорт и туристички крстарења. Дури и малите бродови би имале милиони долари такси, што директно би ги зголемило трошоците за американските потрошувачи“, се вели во соопштението.
Министрите рекоа дека администрацијата на Трамп недвосмислено го отфрла предлогот и нема да толерира никаква регулатива што би ги зголемила трошоците за американските граѓани, добавувачите на енергија, бродските компании и нивните клиенти или туристи.
Тие ги предупредија колегите членови на ММО дека ќе побараат нивна поддршка против новите упатства и нема да се двоумат да возвратат или да истражат правни лекови за граѓаните на САД доколку новата климатска рамка биде официјално прифатена.
