Американските стратегиски резерви на нафта имаат капацитет од 700 милиони барели, а во нив моментално се чуваат речиси 409 милиони барели.
Владата на претходниот американски претседател Џо Бајден почна да ги пополнува резервите минатата година, откако продаде дури 180 милиони барели за да обезбеди снабдување по поставувањето горна граница на цената за нафта од Русија по почетокот на конфликтот во Украина. Групата Г7 им се закани на осигурувачите и превозниците со санкции ако го услужуваат рускиот извоз за повеќе од 60 долари за барел.
Администрацијата на претседателот Доналд Трамп продолжува да ги надополнува залихите, но планот е попречен од недостигот од пари и долгорочната работа за одржување на инфраструктурата на стратегиските резерви.
Стратегиските резерви на нафта се складираат во подземни пештери за сол по должината на брегот на Мексиканскиот Залив, а пумпите, цевките и другата надземна инфраструктура се постојано изложени на корозија и солен воздух.
Во предлогот за буџетот за 2026 година, Трамп предвиде околу 171 милион долари за купување нафта и за одржување на инфраструктурата на стратегиските резерви. Во претходниот предлог беше предвиден износ од 1,3 милијарди долари.
Купување повеќе нафта за стратегиските резерви веројатно ќе бара прифаќање на нов предлог за буџет, забележува Ројтерс.
„Претседателот се обидува да ги надополни резервите на нафта со помош на Конгресот“, кажа министерот за енергетика на САД Крис Рајт.
„Иако процесот нема да биде завршен преку ноќ, овие потези се важен чекор во зајакнувањето на нашата енергетска безбедност и во фундаменталното менување на скапите и неодговорни енергетски политики на претходната влада“, додаде Рајт.
Јавниот тендер за полнење на американските стратегиски резерви на нафта завршува на 28 октомври.
На американскиот пазар, барел нафта во среда попладне изнесуваше 58,25 долари.
