Одлуката е во согласност со барањата на американскиот претседател Доналд Трамп европските нации да преземат поголема одговорност за сопствената безбедност.
Неговата администрација бара НАТО, со кое долго време доминираат САД, да стане „НАТО предводен од Европа“.
Како дел од реконструкцијата на командата, европските офицери ќе ја преземат Здружената команда на сојузничките сили на НАТО во Неапол и Здружената команда на силите во Норфолк, кои моментално ги предводат американски адмирали, изјавил изворот под услов да остане анонимен.
САД ќе преземат три команди нешто пониско во хиерархијата.
На прашањето за планираните промени, функционерот на НАТО кажал: „Сојузниците се согласија за нова распределба на одговорностите на високите офицери во командната структура на НАТО во која европските сојузници, вклучувајќи ги и најновите членки на НАТО, ќе играат позначајна улога во военото раководство на Алијансата“.
Амбасадорот на САД во НАТО Метју Витакер претходно ги отфрли критиките кон САД, тврдејќи дека САД „не се обидуваат да го расформираат НАТО“, пренесе Франс прес.
„Се обидуваме да го зајакнеме НАТО, а не да се повлечеме од него или да го отфрлиме, туку да го направиме функционален како што беше замислен, односно како сојуз од 32 силни и способни сојузници“, додаде тој.
