Обновената трансатлантска соработка во врска со Украина доаѓа откако американскиот претседател Доналд Трамп изрази фрустрација поради континуираните напади на Москва врз својот сосед. Трамп, кој првично имаше попомирувачки тон кон Русија додека се обидуваше да ја заврши повеќе од тригодишната војна во Украина, се закани со царини и други мерки ако Москва не покаже напредок кон завршување на конфликтот до 8 август.
Претседателот минатиот месец изјави дека САД ќе ѝ испорачуваат оружје на Украина, кое ќе го плаќаат европските сојузници, но не посочи како тоа ќе се направи.
Земјите на НАТО, Украина и САД развиваат нов механизам кој би се фокусирал на испорака на американско оружје во Украина од Листата на приоритетни барања за Украина, позната по акронимот ПУРЛ, велат изворите.
Украина ќе го одреди приоритетот на оружјето што ѝ е потребно во транши од околу 500 милиони долари, а НАТО сојузниците – координирани од генералниот секретар на НАТО, Марк Руте – потоа ќе преговараат меѓу себе кој ќе донира или ќе плати за предметите на листата.
Со овој пристап, НАТО сојузниците се надеваат дека ќе обезбедат оружје во вредност од 10 милијарди долари за Украина, изјави европски функционер кој зборуваше под услов да остане анонимен. Не беше јасно во кој временски рок се надеваат да го испорачаат оружјето.
„Тоа е почетна точка и амбициозна цел кон која работиме. Во моментов сме на таа траекторија. Ја поддржуваме амбицијата. Ни треба тој обем“, рече европскиот функционер.
Висок воен функционер на НАТО, исто така под услов да остане анонимен, рече дека иницијативата е „доброволен напор координиран од НАТО во кој сите сојузници се охрабруваат да учествуваат“.
Функционерот рече дека новата шема вклучува сметка на НАТО, каде што сојузниците можат да депонираат пари за оружје за Украина, одобрени од врховниот воен командант на НАТО.
Седиштето на НАТО во Брисел одби да коментира. Белата куќа, Пентагон и украинската амбасада во Вашингтон не одговорија на барањата за коментар. Руските сили постепено напредуваат во Украина и контролираат една петтина од украинската територија.
