Канцеларијата не објасни зошто од списокот отстранила десетици најблиски сојузници на Додик, вклучувајќи ги владините министри, како и неговиот син и ќерка. Но српските претставници посочија дека тие тивко работеле на воспоставување подобра соработка со САД, а воедно ги задржале пријателските врски со сојузникот Русија.
На Додик, поранешен претседател на автономната Српска Република Босна, му беше одземен мандатот во август поради судска пресуда со која му беше забрането да се занимава со политика. Тој беше под санкции на САД од 2017 година поради кршење на мировниот договор од Дејтон, со кој заврши етничката војна во Босна од 1990-тите.
Во објава на својот профил на Икс, Додик им се заблагодари на американскиот претседател Доналд Трамп и на неговите соработници за корекцијата на она што тој го нарече „голема неправда направена кон Република Српска, нејзините претставници и нивните семејства“.
„Одлуката за укинување на санкциите не е само правна, туку и морална рехабилитација на вистината за Република Српска и сите оние што чесно ѝ служат“, рече Додик.
Проруски националист, вели Ројтерс, Додик долго време се залагаше за отцепување на Република Српска од Босна и одби да поднесе оставка од функцијата нејзин претседател.
Сепак, на 18 октомври пратениците на босанските Срби назначија привремен претседател, признавајќи официјално за прв пат дека Додик се повлекува откако државниот суд му забрани да се занимава со политика. Привремениот претседател ќе ја извршува функцијата до предвремените претседателски избори закажани за 23 ноември.
Парламентот, исто така, поништи низа сепаратистички закони што беа донесени во текот на изминатата година откако Додик беше обвинет за непочитување на одлуките на меѓународниот мировен претставник на Босна и на уставниот суд.
Послушност или нова стратегија?
Американскиот Стејт департмент ги поздрави потезите, велејќи дека тие се резултат на напорите предводени од САД „за смирување на кризата во Босна и Херцеговина“.
„Додиковото почитување на одлуката на судот во Сараево сигнализира дека тој сака да остане во добри односи со администрацијата на Трамп“, рече Џеј Труздејл, поранешен американски дипломат со искуство во регионот. „Тој се откажа од своите најзначајни оспорувања на Дејтонскиот договор за да ја смири Белата куќа, иако ја задржува можноста да започне уште една деструктивна кампања за отцепување.“
Додик се жали на пресудата на државниот суд пред уставниот суд, кој се очекува да донесе одлука за неа следната недела. Тој, исто така, се жали на одлуката на изборната комисија да му го одземе претседателскиот мандат.
И покрај назначувањето на неговиот привремен заменик, Додик продолжи да ги извршува должностите и да патува во странство во својство на претседател. Тој рече дека Република Српска нема да ги промени своите политики, а отцепувањето останува негова крајна цел.
