Зборувајќи во Институтот Реган во Вашингтон по средбата со Трамп во Белата куќа, Руте објасни дека разговорите биле фокусирани на идниот статус на Гренланд и на ограничувањето на пристапот на Русија и Кина. „Се согласувам со неговата проценка дека постои голем ризик од посилно ангажирање на Русите и Кинезите во Арктикот. Претседателот е во право – ние мора да се одбраниме“, кажа тој.
Руте наведе дека сојузниците на НАТО се согласиле на Светскиот економски форум во јануари дека Алијансата мора да има посилна улога на Арктикот, што вклучува и заштита на Гренланд. Во овој контекст, Руте го спомна и лансирањето на иницијативата „Арктички стражар“, проект на НАТО чија цел е да ја зајакне координацијата меѓу сојузниците и да ја подобри одбраната во регионот.
Оваа изјава дојде откако вршителот на должноста министер за надворешни работи на Данска Ларс Локе Расмусен вчера изјави дека е јасно дека Трамп не се откажал од своите амбиции да го преземе Гренланд.
Трамп пред неколку дена повторно остро ги критикуваше сојузниците на НАТО кои не им пружија на САД во агресијата врз Иран и повторно го разгоре спорот околу Гренланд.
„Знаете, сè почна, ако сакате да ја знаете вистината, со Гренланд. Ние го сакаме Гренланд. Тие не сакаат да ни го дадат. И јас реков: „Збогум“, рече американскиот претседател, кој се закани дека ќе се повлече од воениот пакт.
Претходно Трамп постојано се закануваше дека ќе го анектира Гренланд, огромна арктичка територија под суверенитет на членката на НАТО Данска, но се повлече пред противењето на европските сојузници.
