Руското Министерство за одбрана објави мапа што ја прикажува рутата на украинските далекометни дронови што, според Москва, биле насочени кон резиденцијата на рускиот претседател Владимир Путин во Новгородската област, рано во понеделникот.
Според руските власти, Киев лансирал вкупно 91 беспилотно летало кон комплексот во ноќта меѓу 28 и 29 декември. Сите дронови биле уништени пред да стигнат до резиденцијата.
Мапата што Министерството за одбрана ја објави во средата ја прикажува трасата на летот на беспилотните летала, а според неа биле лансирани од повеќе локации во Украина и летале кон север, кон Новгородската област, минувајќи низ Брјанската, Смоленската и Тверската област.
Според мапата, руската противвоздушна одбрана соборила 49 дронови над Брјанската област, еден над Смоленската област и уште 41 над Новгородската област, додека се приближувале кон резиденцијата на Путин.
Подоцна во текот на денот, Министерството за одбрана објави и снимки на кои наводно се гледаат остатоците од еден од дроновите користени во нападот.
Во соопштението, Министерството наведе дека доставило „несоборливи докази за терористички напад планиран од режимот во Киев врз резиденцијата на рускиот претседател“.
Намерите на украинската влада, според соопштението, се потврдени со „парчињата од дроновите соборени во Новгородската област, вклучително и оние со боеви глави опремени со специјални ударни елементи наменети за убивање луѓе“.
Сведоштвата на локалните очевидци што ја набљудувале работата на руската противвоздушна одбрана „ги побиваат сите обиди на западните и антируски медиуми“ да тврдат дека „нема докази за терористички напад од страна на режимот во Киев“, се наведува во соопштението.
Украинскиот претседател Володимир Зеленски, кој негира дека имало напад со дронови врз резиденцијата на Путин, „или не е свесен за вистинската состојба, или едноставно лаже, како што тоа обично го прави“, тврди министерството.
Кремљ претходно соопшти дека нападот со дронови не бил насочен само против Путин, туку и „против напорите на (американскиот) претседател (Доналд) Трамп да посредува во мирно решавање на конфликтот во Украина“.
