Како и во претходните зими, Русија ги интензивираше нападите врз енергетските објекти во Украина, што доведе до прекини во греењето и водоснабдувањето, во она што Киев и неговите сојузници го опишуваат како намерна стратегија за исцрпување на цивилното население.
Масовниот руски напад со дронови ја прекина и електричната енергија во Запорошкиот регион, оставајќи илјадници луѓе без струја или греење, соопшти доцна во средата државниот оператор на електроенергетската мрежа Укренерго.
„Продолжуваат работите за санација во Дњепропетровскиот регион за обновување на греењето и водоснабдувањето за повеќе од еден милион корисници“, напиша на социјалните мрежи министерот за обнова Олексиј Кулеба.
Украинските воздухопловни сили соопштија дека Русија нападнала со 97 дрона, од кои 70 биле соборени од противвоздушната одбрана, а 27 погодиле различни локации, без дополнителни детали.
Клучната енергетска инфраструктура на Дњепропетровскиот регион била оштетена во нападот, според началникот на регионалната воена управа Владислав Хаиваненко.
„Ситуацијата е тешка. Меѓутоа, штом ќе дозволи безбедносната состојба, енергетските работници ќе започнат со работи за обновување“, напиша тој на Телеграм.
Во Запорожје, снабдувањето со електрична енергија е обновено за „клучните објекти“, но поголем дел потрошувачи сè уште се без струја, изјави гувернерот Иван Федоров.
Киев одговори на долгогодишното таргетирање на неговата енергетска мрежа со напади врз руски складишта и рафинерии за нафта, настојувајќи да го пресече клучниот енергетски извоз на Москва и да предизвика недостиг од гориво.
