Српското министерство за одбрана кон крајот на јуни објави дека, во согласност со упатствата на претседателот, кој е и врховен командант на српските вооружени сили, извозот на оружје и воена опрема произведена во Србија е суспендиран, откако Москва претходно таа недела го обвини Белград за индиректна продажба на артилериска муниција на Украина.
Соопштението на министерството за одбрана дојде откако руската Агенција за надворешно разузнавање (СВР) објави дека две српски компании продаваат ракети за повеќецевни лансери и минофрлачки гранати, или компоненти за нив, кои се извезуваат во Украина преку две компании во Чешка и Бугарија. Тоа беше второ такво обвинение од страна на СВР по првото, објавено на 29 мај.
Вучиќ потоа, по состанокот со военото раководство, изјави дека земјата ја запрела целата продажба на оружје, без да ја поврзе таа одлука со соопштението на руското разузнавање, второ во последниот месец во кое Белград беше директно обвинет дека неговата воена индустрија е „свесна за вистинските потрошувачи“ на своите производи.
Оценувајќи ги односите меѓу Белград и Москва како „генерално позитивни“, рускиот амбасадор во Србија, Александар Боцан Харченко, во интервју за белградскиот весник Политика денес изјави дека има „загрижувачки“ работи, споменувајќи го извозот на муниција од Србија во Украина.
„Исто така, имаше ситуација во врска со пристигнувањето на српска муниција во украинските вооружени сили, која претседателот Вучиќ, се надеваме, ја реши веднаш“, рече Харченко.
На забелешката на новинарот дека Србија има проблем со таканаречените „крајни корисници“ на извезената муниција, рускиот дипломат забележа дека овој проблем постои, но смета дека „тука претседателот Вучиќ конечно смисли решение што ја спречува можноста за измама од таканаречените крајни корисници и испорака на српско оружје во Украина“.
„Не велам дека Србија директно испорачала оружје во Киев“, кажа Бочан Харченко.
Наведувајќи дека Белград не се приклучи на западните санкции против Русија и нема намера да го стори тоа, тој додаде дека руско-српската соработка продолжува.
„Ја продолжуваме соработката, која не оди со иста брзина како порано, бидејќи земјите околу Србија се претежно антируски настроени. Во оваа смисла, санкциите се логистичка пречка“, кажа Харченко во интервјуто за весникот Политика, тврдејќи дека, без оглед на тоа, двете земји работат на економскиот фронт.
Србија ја смета Русија за традиционален сојузник и во голема мера е зависна од рускиот гас и во моментов има поволни договори со Москва, кои Белград се обидува да ги продолжи.
