Рускиот претседател Владимир Путин во неделата предложи директни преговори со Украина во Истанбул.
Украинскиот претседател Володимир Зеленски во четвртокот пристигна во турската престолнина Анкара на средба со турскиот претседател Реџеп Таип Ердоган, додека во Истанбул, руските и украинските лидери одвоено го чекаат почетокот на преговорите.
Авионот на украинскиот претседател слета на аеродромот Есенбога во Анкара и денеска напладне треба да се сретне со Ердоган.
Путин во средата рече дека на мировните преговори испраќа делегација во која нема да биде тој.
Сега не е јасно како ќе одговори Украина, која сѐ уште јавно не објави кого ќе испрати.
Русија го испраќа претседателскиот советник Владимир Медински, заменик-министерот за одбрана и министерот за надворешни работи, како и шефот на воената разузнавачка агенција ГРУ.
Зеленски претходно оваа недела рече дека е подготвен да разговара само со Путин, предизвикувајќи го да дојде во Истанбул „доколку е доволно храбар“.
Кремљ одговори дека Русија не прифаќа ултиматуми. Двете страни последен пат одржаа директни разговори во март 2022 година, исто така во Истанбул, само неколку недели откако Путин го нареди нападот врз Украина.
Двете страни се обидуваат да му докажат на американскиот претседател Доналд Трамп дека се сериозни во напорите за мир.
Американскиот претседател моментално е на турнеја на Блискиот Исток и во четвртокот рече дека ќе дојде во Турција еден ден подоцна „ако му одговара“.
Потврденото отсуство на Путин ги намали очекувањата за преговорите. Зеленски сака веднаш 30-дневно примирје, а Путин сака прво да започне разговори, а потоа да ги утврди деталите за прекинот на огнот.
