Снимките ги објави шведската телевизија СВТ. Тие покажуваат интензивна активност на четири локации: Каменка на Карелискиот истмус, Петрозаводск, Североморск-2 и Олења. Според проценките, Русија го зголемува своето воено присуство во регионот како одговор на влегувањето на Финска и Шведска во НАТО.
🔴 Russia is rapidly expanding military bases near Finland, boosting troop numbers and building new infrastructure, in what experts warn could be preparations for future conflict with NATO.https://t.co/zs6YqVly1Y pic.twitter.com/ho3Ozr9IIb
— UNITED24 Media (@United24media) May 13, 2025
Од февруари 2025 година, повеќе од 130 воени шатори се поставени во Каменка, на само 60 километри од финската граница. Областа, која беше целосно празна во 2022 година, сега, според проценките, може да прими до 2.000 војници. Воениот аналитичар Емил Кастехелми оценува дека ова е „зголемена активност“ и одложување на спроведувањето на мерките што Русија претходно ги објави како одговор на проширувањето на НАТО.
Во Петрозаводск, на околу 175 километри од границата, изградени се три големи складишни сали, секоја со капацитет за приближно 50 оклопни возила. Четвртиот објект е во изградба. Аналитичарите се сомневаат дека целта на овие објекти би можела да биде прикривање на вистинскиот број на распоредени возила.
Понатаму на север, над Арктичкиот круг, се реновира поранешната воздухопловна база Североморск-2. На пистата веќе се видливи хеликоптери, а се верува дека пистата се подготвува и за борбени авиони со фиксни крила.
Нова активност е пријавена и во воздухопловната база Олења, од која дејствуваат руски стратешки бомбардери. Според украински извори, бомбардерите од Олена се користат за напади врз украински цели.
Шефот на шведската армија, Михаел Клаесон, изјави дека овие случувања се потврда за она што Русија го најави како „воено-технички одговор“ на проширувањето на НАТО. „Кога аплициравме за членство во НАТО, Русија рече дека ќе преземат одредени мерки. Сега гледаме дека ги спроведуваат“, изјави Клаесон.
Финска официјално стана членка на НАТО во 2023 година, поместувајќи ја границата на Алијансата директно кон северозападна Русија. Како одговор на тоа, Финска ги зајакнува сопствените одбранбени капацитети и гради команден центар на НАТО во Лапонија, кој треба да биде оперативен до крајот на годината.
Иако Русија на почетокот не реагираше воено, новите сателитски снимки покажуваат дека на нивната страна од границата се одвиваат систематски подготовки. Овие активности се одвиваат паралелно со продолжувањето на руската инвазија на Украина и зголеменото меѓународно набљудување на воената ситуација во балтичкиот и арктичкиот регион. Воени претставници од Финска и Шведска велат дека внимателно го следат понатамошниот развој на настаните.
