Во пост кој вчера го поставија на Фејсбук, руската амбасада го обвинува Судот на БиХ дека од политички причини го осуди Додик на една година затвор и шестгодишна забрана за политичко дејствување поради непочитување на одлуките на високиот претставник на Западот.
Тврдат дека Судот на БиХ „со банално повторување на квазиправните англосаксонски тези“ самиот себе се уверил дека Кристијан Шмит е легитимно избран за висок претставник па така имал право да ги наметне измените на кривичниот закон врз основа на кои Додик е осуден.
Мандатот на сегашниот висок претставник го опишуваат како „специјална операција“ по која посегнал Западот за да го „инсталира германскиот државјанин Шмит“.
Додаваат дека е без преседан тоа што Советот за безбедност на Обединетите нации го игнорираше руското противење на именувањето на Шмит.
Во соопштението се наведува дека е жално тоа што Судот на БиХ, кој би требало да биде стандард за објективна и непристрасна судска постапка и пример за служење на владеењето на правото и законите „дозволил да биде вовлечен во англосаксонските провокации, кои имаат само една цел – да ги раскараат народите на Босна и Херцеговина“.
„Ако Франкенштајнот на војната и конфликтот повторно се појави тука, тоа ќе биде исклучиво вина на западните хушкачи и провокатори“, се наведува во објавата.
Иако е членка на Управниот одбор на Советот за спроведување на мирот во БиХ, Русија со години не учествува во работата на тоа тело чија задача е да ја координира работата на Канцеларијата на високиот претставник, поради тоа што воопшто не се уважуваат нејзините ставови.
