Без директно да го спомне Трамп, руското Министерство за надворешни работи изрази сериозна загриженост за ескалацијата на тензиите околу „Островот на слободата“.
„Русија ја потврдува својата непоколеблива солидарност со владата и братскиот народ на Куба“, објави руското министерство. „Остро ги осудуваме обидите за грубо мешање во внатрешните работи на суверена држава, заплашувањето и употребата на нелегални еднострани рестриктивни мерки“, се додава во соопштението.
Трамп го зголеми економскиот притисок врз Куба и воведе ембарго за нафта кое дополнително ја продлабочи кризата во таа земја. Њујорк тајмс објави дека отстранувањето на кубанскиот претседател Мигел Дијаз-Канел е клучна цел на САД.
Повикувајќи се на четири лица запознаени со преговорите, Њујорк тајмс објави дека Американците им сигнализирале на кубанските преговарачи дека Дијаз-Канел мора да си замине, но ги оставаат следните чекори на Кубанците.
Кремљ соопшти дека е во контакт со кубанското раководство и дека Москва е подготвена да обезбеди секаква можна помош. „Островот на слободата се соочува со невидени предизвици, кои станаа директна последица на долгорочното трговско, економско, финансиско и, неодамна, енергетското ембарго на САД против Куба“, објави руското Министерство за надворешни работи.
Русија соопшти дека ќе продолжи да „ѝ обезбедува на Куба потребна поддршка, вклучително и финансиска“. Таа остана без сојузници откако САД го киднапираа венецуелскиот лидер Николас Мадуро, но профитира од високите цени на нафтата предизвикани од американските и израелските напади врз Иран, стратегиски партнер на Москва.
Куба беше близок сојузник на Москва со децении по комунистичката револуција во 1959 година, која го донесе Фидел Кастро на власт, сè до распадот на Советскиот Сојуз. Потоа Русија продолжи да ја поддржува Куба и со финансирање и со материјална помош.
