Најмалку 40 отсто од руските извозни капацитети за нафта во моментов се надвор од функција поради украински напади со дронови, оштетувања на клучна инфраструктура и заплени на танкери, покажуваат проценките на Ројтерс базирани на пазарни податоци.
Ова е најголемиот прекин во снабдувањето со нафта во поновата историја на Русија — вториот најголем светски извозник — и доаѓа во момент кога цените на нафтата, поради војната со Иран, надминаа 100 долари за барел.
Руската нафтена индустрија е клучен извор на приходи за државниот буџет и основа на економијата вредна околу 2,6 билиони долари.
Украина во последните недели ги засили нападите врз руската енергетска инфраструктура, погодувајќи ги трите главни западни извозни пристаништа: Новоросијск на Црно Море, како и Приморск и Уст-Луга на Балтичко Море. Истовремено, погоден е и нафтоводот „Дружба“, кој преку Украина снабдува делови од Централна Европа.
Според проценките, околу два милиони барели дневно — односно 40 отсто од капацитетот — се моментално блокирани. Нападнати се и пумпни станици и рафинерии, додека Киев отворено наведува дека целта е да се намалат приходите на Москва и да се ослаби нејзината воена моќ.
Покрај тоа, зачестените заплени на танкери во Европа го нарушија извозот од арктичките пристаништа, особено од Мурманск. Поради тоа, Русија сѐ повеќе се потпира на извоз кон Азија, иако тие рути имаат ограничен капацитет.
Сепак, испораките кон Кина продолжуваат преку источните нафтоводи и преку пацифичкото пристаниште Козмино, како и од проектите на Сахалин, што делумно го ублажува ударот врз извозот.
