„Предложените мерки и решенија ги доживуваме многу сериозно, но ние не можеме сето тоа да го прифатиме како што е. Сè што во моментов постои е обид за наоѓање некаква шема која би овозможила, како што тоа Американците го гледаат, некакво постигнување на прекин на огнот“, објасни Рјабков.
Според него, потоа би следел премин на некои други модели и шеми во кои, како што проценува, во моментов нема место за главното барање на Русија – решавање на проблемите поврзани со причините за конфликтот.
„Токму тоа целосно недостига и тоа мора да се надмине“, истакна Рјабков.
Како што додаде, Москва има длабоко и темелно разработена низа сопствени приоритети и пристапи кон ова прашање, кои, меѓу другото, биле во фокусот на руската преговарачка екипа на неодамнешните преговори во Ријад, пренесува руската новинска агенција РИА.
На 18 март претседателите Владимир Путин и Доналд Трамп разговараа телефонски. Во таа прилика рускиот претседател позитивно реагирал на идејата за меѓусебно откажување на страните во конфликтот во Украина од напади на објекти на енергетската инфраструктура на 30 дена и ја дал соодветната наредба на војската. Накнадно украинскиот претседател Володимир Зеленски изјави дека Киев го поддржува тој предлог.
Потоа на 24 март во Ријад беа одржани преговори на стручни тимови од Русија и Соединетите Американски Држави, по кои претставниците на двете земји се договорија да развија механизам за забрана на такви напади. На листата на енергетски објекти кои страните за време на примирјето не би смееле да ги напаѓаат се најдоа рафинерии за нафта, нафтоводи и гасоводи, складишта, електроцентрали, трафостаници, трансформатори, нуклеарни централи и хидроцентрали.
Москва и Киев заемно се обвинуваат за кршење на договорот.
Русите во Украина обвинија дека, само неколку часа по разговорот на Путин и Трамп, украински борци ја нападнале станицата за вадење нафта Кавкаска во Краснодарскиот крај и ги обвинија за уште неколку напади потоа. Портпаролот на Кремљ Дмитриј Песков изјави дека тие потези на Киев најдобро покажуваат дека режимот на Зеленски не е способен за договор.
