Плановите на САД за присуство во сирискиот главен град, за кои претходно немаше извештај, би биле знак за стратегиско поместување на Сирија кон САД по падот на долгогодишниот лидер Башар ал Асад, сојузник на Иран, минатата година.
Базата е на влезот во делови од јужна Сирија за кои се очекува да ја формираат демилитаризираната зона според договорот за неагресија меѓу Израел и Сирија. Тој договор е посредуван од администрацијата на американскиот претседател Доналд Трамп.
Трамп ќе се сретне со сирискиот претседател во понеделник
Во понеделник Трамп ќе се сретне со сирискиот претседател Ахмед ал Шара во Белата куќа, што ќе биде прва таква посета на сириски шеф на држава.
Ројтерс разговарал со шест извори запознаени со подготовките во базата, вклучувајќи двајца западни претставници и еден сириски функционер за одбрана, кои ги потврдиле плановите на САД да ја користат базата за следење на потенцијален договор меѓу Израел и Сирија.
По објавувањето на текстот, извор во сириското министерство за надворешни работи го негираше извештајот на Ројтерс, велејќи дека е „лажен“, пренесе државната новинска агенција САНА.
Изворот не прецизирал што точно е неточно во извештајот.
„Станува збор за пренесување на партнерствата и договорите кои претходно беа постигнати со привремените субјекти во Дамаск, во рамки на заедничката политичка, воена и економска координација“, додава САНА, повикувајќи се на истиот извор.
Пентагон и сириското министерство за надворешни работи не одговориле веднаш на барањата за коментар за планот. Ниту кабинетот на претседателот, ниту сириското министерство за одбрана не одговориле на прашањата испратени преку министерството за информации.
Функционер на американската администрација кажал дека САД „постојано ја проценуваат својата потребна позиција во Сирија за ефикасна борба против ИСИС (Исламска држава)“ и дека „не коментираат локациите или можните локации каде што дејствуваат американските сили“.
Функционерот побарал името и локацијата на базата да бидат отстранети од безбедносни причини, што Ројтерс го прифатил.
Еден западен воен функционер кажал дека Пентагон ги забрзал плановите во изминатите два месеци со неколку извидувачки мисии во базата. Тие мисии заклучиле дека долгата писта на базата е подготвена за моментална употреба.
Два сириски воени извори изјавиле дека техничките разговори се фокусирале на користење на базата за логистика, надзор, полнење гориво и хуманитарни операции, додека Сирија ќе го задржи целосниот суверенитет над објектот.
Сириски функционер за одбрана изјавил дека САД слетале воени транспортни авиони Ц-130 во базата за да ја проверат исправноста на пистата. Чувар на обезбедувањето на еден од влезовите во базата изјавил за Ројтерс дека американските авиони слетаат таму како дел од „тестови“.
Сè уште не е јасно кога американски воен персонал ќе биде распореден во базата.
Заедничко сириско-американско присуство
Новите планови на САД се чини дека го следат моделот на две други нови американски воени бази во регионот кои ги следат договорите за прекин на огнот: една во Либан, која внимателно го следи минатогодишното примирје меѓу либанската вооружена група Хезболах и Израел, и друга во Израел, која го надгледува примирјето на Трамп меѓу палестинската милитантна група Хамас и Израел.
САД веќе имаат војници стационирани во североисточна Сирија како дел од 10-годишниот напор да им помогнат на силите предводени од Курдите во борбата против Исламска држава. Во април, Пентагон објави дека ќе го преполови бројот на војници таму на 1.000.
Шара кажа дека секое американско воено присуство мора да се договори со новата сириска држава. Сирија наскоро ќе се приклучи на глобалната коалиција предводена од САД против ИСИС, според американски и сириски официјални лица.
Лице запознаено со разговорите за базата кажало дека потегот бил дискутиран за време на посетата на Дамаск на 12 септември од страна на адмиралот Бред Купер, командант на Централната команда на САД (Центком).
Во соопштението на Центком во тоа време се наведува дека Купер и претставникот на САД за Сирија Томас Барак разговарале со Шара и му се заблагодариле за неговиот придонес во борбата против Исламска држава во Сирија, за што се вели дека може да помогне во остварувањето на „визијата на Трамп за просперитетен Блиски Исток и стабилна Сирија во мир со себе и со своите соседи“. Израел не е споменат во соопштението.
САД со месеци работат на постигнување безбедносен пакт меѓу Израел и Сирија, долгогодишните непријатели. Вашингтон планирал да го објави договорот на Генералното собрание на Обединетите нации во септември, но разговорите заглавиле во последен момент.
Сириски извор запознаен со преговорите изјавил за Ројтерс дека Вашингтон врши притисок врз Сирија да постигне договор до крајот на годината, а можеби и пред посетата на сирискиот претседател на Вашингтон.
