Американскиот претседател Доналд Трамп изјави дека Соединетите Американски Држави извршиле напади врз Венецуела и го заробиле Мадуро, кој потоа бил изнесен од земјата заедно со неговата сопруга Силвија Флорес.
Во продолжение ги пренесуваме реакциите во врска со нападот кој САД ја извршија утрово во Венецуела.
Каја Калас: Мадуро „нема легитимитет“, ЕУ повикува на воздржаност
Високата претставничка на Европската Унија за надворешна политика и безбедност Каја Калас изјави дека Брисел постојано објавува дека венецуелскиот претседател Николас Мадуро „нема легитимитет“ и повика на воздржаност и почитување на меѓународното право во врска со ситуацијата.
„Разговарав со државниот секретар Марко Рубио и нашиот амбасадор во Каракас. ЕУ внимателно ја следи ситуацијата во Венецуела“, напиша Калас во објава на социјалната мрежа Икс.
„ЕУ постојано објавува дека господин Мадуро нема легитимитет и поддржува мирна транзиција. Во сите околности, мора да се почитуваат принципите на меѓународното право и Повелбата на Обединетите нации. Апелираме на воздржаност“, додаде Калас.
Али Хамнеи: Нема да го послушаме непријателот
„Важно е дека, кога некој ќе сфати дека непријателот арогантно се обидува да им наметне нешто на државата, функционерите, владата и народот, мора цврсто да застане против непријателот и да поддржи отпор. Нема да го послушаме непријателот“, кажа врховниот лидер на Иран, ајатолахот Али Хамнеи.
„Потпирајќи се на Семоќниот Бог, верувајќи во Бога и со верба во поддршката на народот, ако Бог даде и со божествена милост, ќе го фрлиме непријателот на колена.
“Тринидад и Тобаго продолжува да одржува мирни односи со народот на Венецуела
Премиерката на Тринидад и Тобаго Камла Персад Бисесар изјави дека рано утрово, Соединетите Американски Држави започнаа воени операции на територијата на Венецуела.
„Тринидад и Тобаго не учествува во ниту една од овие тековни воени операции. Тринидад и Тобаго продолжува да одржува мирни односи со народот на Венецуела“, кажа таа.
Индонезија: Почитувајте го меѓународното право
Индонезија ги следи настаните во Венецуела со цел да ја обезбеди безбедноста на своите граѓани.
„Индонезија ги повикува сите релевантни страни да дадат приоритет на мирно решение преку деескалација и дијалог, со приоритет на заштитата на цивилите. Индонезија ја нагласува важноста на почитувањето на меѓународното право и принципите на Повелбата на Обединетите нации“, изјави портпаролката на индонезиското Министерство за надворешни работи Ивон Мевенканг.
Шпанија повикува на деескалација и почитување на меѓународното право во Венецуела
Шпанија повика на деескалација, воздржаност и почитување на меѓународното право во Венецуела, објави шпанското Министерство за надворешни работи.
Во соопштението се наведува и дека Шпанија се нуди како посредник за да помогне во наоѓање мирно решение во Венецуела.
Германското Министерство за надворешни работи објави дека со голема загриженост ги следи случувањата во Венецуела и дека кризен тим ќе се состане подоцна во текот на денот за понатамошни консултации.
Во писмената комуникација до која дојде агенцијата Ројтерс, се наведува дека министерството е во близок контакт со амбасадата во Каракас и дека кризниот тим ќе се состане подоцна денес.
Тајани: Италија ги следи настаните во Венецуела, фокусот е на италијанската заедница
Министерот за надворешни работи на Италија Антонио Тајани објави дека Рим и дипломатската мисија на Италија во Каракас го следат развојот на ситуацијата во Венецуела, со посебно внимание посветено на италијанската заедница во таа земја.
Во објава на мрежата Икс Тајани изјави дека италијанската премиерка Џорџа Мелони е постојано информирана за случувањата, како и дека кризна единица на Министерството за надворешни работи е во функција.
Италијанскиот амбасадор во Венецуела изјави за италијанската државна телевизија РАИ дека во таа земја моментално живеат околу 160.000 Италијанци, од кои повеќето имаат двојно државјанство, како и одреден број луѓе кои се во Венецуела поради работа или туризам.
Белгија ја следи ситуацијата во координација со своите европски партнери
Белгија се координира со европските партнери за внимателно следење на ситуацијата во Венецуела, објави министерот за надворешни работи на земјата.
„Нашата амбасада во Богота, која е одговорна за Венецуела, како и нашите служби во Брисел, се целосно мобилизирани. Ситуацијата се следи внимателно, во координација со нашите европски партнери“, изјави белгискиот вицепремиер и министер за надворешни работи Максим Прево во објава на мрежата Икс.
Мелони: Внимателно ја следиме ситуацијата во Венецуела
Италијанската премиерка Џорџа Мелони објави дека „внимателно ја следи ситуацијата во Венецуела“ со цел „да собираат информации за нашите граѓани“ кои се наоѓаат во таа земја.
Мелони додаде дека е во постојан контакт со италијанскиот министер за надворешни работи Антонио Тајани.
Околу 160.000 Италијанци моментално живеат во Венецуела, повеќето од нив со двојно државјанство.
