Синоќешната објава на републиканскиот претседател денеска беше отстранета, а вината му беше префрлена на вработен, по масовните реакции — од лидери за граѓански права до искусни републикански сенатори — поради начинот на кој беа прикажани првиот црн претседател и прва дама на САД. Бришењето, редок чин на признавање грешка од Белата куќа, уследи само неколку часа откако портпаролката Каролин Ливит ја отфрли „лажната огорченост“ околу објавата. По повиците таа да биде отстранета како расистичка — вклучително и од републиканци — Белата куќа соопшти дека видеото било објавено по грешка од вработен и дека е тргнато.
Објавата беше дел од серија активности на профилот на Трамп на социјалната мрежа Трут сошл, со кои тој ги придружи своите лажни тврдења дека изборите во 2020 година му биле украдени, иако судовите низ целата земја и јавниот обвинител од неговиот прв мандат утврдија дека нема докази за измама што би можела да влијае врз исходот.
Портпаролката на Обама изјави дека поранешниот претседател, демократ, нема коментар.
Речиси целиот клип од 62 секунди, кој беше меѓу десетиците објави на Трут сошл што Трамп ги постави во текот на ноќта, изгледа дека потекнува од конзервативно видео во кое се тврди дека имало намерно манипулирање со гласачките машини во клучните сојузни држави додека се броеле гласовите на претседателските избори во 2020 година. На 60-тата секунда се појавува кратка сцена со два мајмуни, на кои им се прикачени насмеаните лица на Обамовци.
„Интернет-меме“
Тие кадри биле преземени од посебно видео што претходно го ширел влијателен конзервативен креатор на мемиња. Во него Трамп е прикажан како „крал на џунглата“, а низа демократски лидери се прикажани како животни, вклучително и Џо Бајден, кој е белец, а е прикажан како мајмун што јаде банана.
„Ова е од интернет-меме видео што го прикажува претседателот Трамп како крал на џунглата, а демократите како ликови од ‘Кралот лав’“, напиша Ливит во порака, повикувајќи се на анимираниот филм на Дизни од 1994 година, кој всушност не го прикажува спектарот на примати што се појавуваат во оригиналното видео. „Ве молам престанете со лажната огорченост и известувајте денес за нешто што навистина е важно за американската јавност.“
До пладне, објавата беше тргната, а одговорноста му беше префрлена на подреден на Трамп.
Трамп не го коментираше видеото во самата објава, која се појави во првата недела од Месецот на црнечката историја и неколку дена по претседателска прокламација во која се наведуваат „придонесите на црните Американци за нашата национална големина и нивната трајна посветеност на американските принципи на слобода, правда и еднаквост“.
Осуда низ целиот политички спектар
Додека сè уште беше достапна, објавата на Трамп предизвика осуда од целиот политички и идеолошки спектар.
Свештеничката Бернис Кинг, ќерка на убиениот легендарен борец за граѓански права Мартин Лутер Кинг, потсети на зборовите на својот татко: „Да. Јас сум црнец. Горд сум со тоа. Јас сум црнец и убав сум.“ Таа ги пофали црните Американци како „разновидни, иновативни, вредни и креативни“ и додаде: „Ние сме му мили на Бог — како поштенски работници и професори, како поранешна прва дама и претседател. Ние не сме мајмуни.“
Единствениот црн републиканец во американскиот Сенат, Тим Скот од Јужна Каролина, го повика Трамп да ја отстрани објавата. „Се молам да е лажна, затоа што ова е најрасистичкото нешто што сум го видел од оваа Бела куќа“, напиша Скот, кој раководи со републиканската кампања за меѓуизборите.
Друг републиканец, сенаторот Роџер Викер од Мисисипи, кој е белец, но претставува држава со најголем процент црно население, ја нарече објавата „целосно неприфатлива“ и рече дека претседателот треба да се извини.
Претседателот на Националната асоцијација за развој на обоените луѓе, Дерик Џонсон, во соопштение наведе: „Видеото на Доналд Трамп е отворено расистичко, одвратно и целосно за презир.“
Џонсон тврди дека Трамп се обидува да одвлече внимание од економските услови и од фокусот врз досиејата за Џефри Епстин.
„Знаете кој не е во досиејата за Епстин? Барак Обама“, рече Џонсон. „И знаете кој навистина ја подобри економијата како претседател? Барак Обама.“
Трамп и официјалните профили на Белата куќа често репостираат мемиња и видеа генерирани со вештачка интелигенција. Како и во петокот со Ливит, помошниците на Трамп обично ги отфрлаат критиките и ги прикажуваат сликите како хумористични.
Долга историја на расизам
Во САД постои долга историја на поврзување на црните луѓе со животни, вклучително и мајмуни, од страна на моќни белци, на очигледно лажен и расистички начин. Таа практика датира уште од 18 век, од културниот расизам и псевдонаучните теории во кои белците воспоставувале врски меѓу Африканците и мајмуните за да го оправдаат поробувањето на црните луѓе во Европа и Северна Америка, а подоцна и за да ги дехуманизираат ослободените црни луѓе како нецивилизирана закана за белците.
Томас Џеферсон, авторот на Декларацијата за независност, во своето познато дело „Белешки за државата Вирџинија“ напишал дека црните жени биле претпочитани сексуални партнери на орангутани. Претседателот Двајт Ајзенхауер, зборувајќи за укинување на расната поделба во јавните училишта во 1950-тите, еднаш тврдел дека белите родители биле загрижени нивните ќерки да бидат во училници со „големи црни мажјаци“. Обама, како кандидат и како претседател, беше прикажуван како мајмун или како друг примат на маици и на друг вид сувенири.
Трамп, од своја страна, има историја на интензивни лични напади врз Обамовци и користење запалива, понекогаш расистичка реторика.
Во кампањата во 2024 година, Трамп изјави дека имигрантите ја „трујат крвта на нашата земја“, јазик сличен на оној што Адолф Хитлер го користеше за дехуманизација на Евреите во нацистичка Германија.
За време на неговиот прв мандат во Белата куќа, Трамп голем број земји во развој со претежно црно население ги нарече „јами со гомна“. Првично негираше дека ја употребил навредата, но во декември 2025 година призна дека навистина го кажал тоа.
Кога Обама беше во Белата куќа, Трамп ги ширеше лажните тврдења дека 44-тиот претседател, роден на Хаваите, бил роден во Кенија и затоа уставно неподобен да ја извршува функцијата.
Во интервјуа што придонесоа да им стане симпатичен на многу конзервативни гласачи, тој повеќепати бараше Обама да го објави изводот на родени и да докаже дека е „роден како државјанин на земјата“ како што се бара за да се стане претседател.
Обама на крај ги објави документите од Хаваите. Трамп дури во текот на кампањата во 2016 година, откако ја освои републиканската номинација, призна дека Обама е роден на Хаваите. Но веднаш потоа лажно изјави дека неговата демократска ривалка Хилари Клинтон ги започнала тие лажни напади за местото на раѓање на Обама.
