Најголемите сообраќајни барикади се поставени по централната патна мрежа, вклучувајќи делови од националниот пат Атина-Солун, автопатите Игнатија, Јон и Олимпија, како и на граничните премини Евзони и Ники кон Македонија и Промахона и Егзохиу кон Бугарија.
Врховниот суд нареди поведување кривична постапка по службена должност против организаторите на нелегални дејствија за време на протестите, со можност за апсење на лице место.
Национален состанок на претставници на блокадите ќе се одржи во Никеја, во близина на Лариса, во сабота, за да се разговара за следните чекори и да се договори список на барања.
Се очекува фокусот на протестите денес да биде товарниот терминал на пристаништето Волос, каде што земјоделците од Тесалија планираат блокада.
На мостот Рио-Антирио, земјоделците од Ајтолоакарнанија и Ахаја подготвуваат протести, вклучително и затворање на наплатни рампи на неколку часа.
Блокадите продолжуваат и на автопатот Антирио-Јанина, како и на мостовите Морнос и Евинос и на патот Амвракија.
Во регионот Ахаја, барикади се поставени на неколку точки, вклучувајќи ги автопатите Патра-Пиргос и Патра-Коринт, пренасочувајќи го сообраќајот кон локалните патишта.
Националниот автопат Атина-Ламија останува затворен на четири клучни точки – во Брало, Аталанти, Кастро и Тива, предизвикувајќи големи пренасочувања кон регионалните и старите патни правци во траење од неколку десетици километри.
Блокадите се интензивираат и во северна Евија, додека земјоделците се собираат во Халкида за да координираат понатамошни активности.
Во Тесалија, протестите продолжуваат на постојните контролни пунктови на автопатот Е65, во близина на Кардица и Трикала, при што бројот на трактори и поддршката од локалните организации се зголемува секојдневно.
Во областа на Солун земјоделците остануваат на блокадата Малгари, и покрај интервенцијата на обвинителот.
На Крит демонстрантите трет ден по ред ја окупираат зградата на Децентрализираната администрација во Ираклион, каде што земјоделци од неколку области преноќуваат, со најава за нови одлуки од Координативниот комитет за продолжување на протестите.
Протестите и блокадите ќе продолжат низ целата земја, додека земјоделците најавуваат понатамошно интензивирање на своите активности, пишува весникот.
Главните барања на земјоделците се обештетување, намалени трошоци за производство и поевтина нафта, како и субвенции за земјоделските стопанства.
Незадоволството расте поради долгогодишното фалсификување на податоците за земјиштето и бројот на добиток за добивање европски средства, што годинава го посочија европските обвинители.
