Путин на средбата со Лукашенко изјави дека првите ракети од новиот хиперсоничен систем ќе бидат стационирани во Белорусија оваа година. Рускиот претседател го предупреди Западот дека новиот ракетен систем може да се користи против земјите што ѝ дозволиле на Украина да ги користи своите ракети со долг дострел за напад на руска територија.
Командантот на руските ракетни сили изјави дека новата ракета може да носи и конвенционални и нуклеарни боеви глави и дека цела Европа е во нејзиниот дострел. Ракетите достигнуваат брзина до 10 маха, имаат повеќе боеви глави, имуни се на пресретнување и, според Путин, „толку се моќни што може да се споредат со нуклеарен напад“, пренесува Јутарњи лист.
Ракетата „орешник“, со среден дострел (500 до 5.500 км), претходно беше забранета со договорот за контрола на оружјето од времето на Студената војна, но САД и Русија се повлекоа од тој договор во 2019 година.
Путин рече дека подготвителните работи за распоредување на ракетите се во тек и се очекува да бидат завршени пред крајот на годината. Првата серија е веќе достапна за руските вооружени сили.
Русија го тестираше „орешник“ за прв пат на 21 ноември 2024 година, во напад на украинскиот град Днипро, каде, како што велат, цел била воена фабрика од советската ера. Нападот руските власти го претставија како одмазда за употребата на американски и британски ракети со долг дострел на руска територија.
Западните аналитичари веруваат дека „орешник“ е подобрена верзија на рускиот систем РС-26 „рубеж“, развиен во 2011 година. Путин додаде дека истовременото лансирање на повеќе ракети „орешник“ би можело да има разорен ефект еквивалентен на нуклеарен удар.
