Примајќи го Родригез во Кремљ, Путин ја нагласи долгогодишната поддршка на Москва за Хавана. „Секогаш сме биле на страната на Куба во нејзината борба за независност и правото да го избере својот пат“, кажа Путин. „Ова е посебен период, со оглед на новите санкции. Вие го знаете нашиот став за тоа. Ние не прифаќаме такви работи“, додаде рускиот лидер.
Родригез се заблагодари за поддршката. „Исто така, би сакал да се заблагодарам на руската солидарност која претседателот, руската влада и министерот за надворешни работи ја изразија на цврст и постојан начин“, му кажа кубанскиот министер на рускиот претседател.
Пред средбата со Путин кубанскиот дипломат се сретна со својот руски колега Сергеј Лавров, кој го критикуваше Вашингтон користејќи реторика од советската ера. „Ги повикуваме САД да покажат здрав разум и да се воздржат од поморска блокада на островот на слободата“, кажа Лавров.
Родригез на разговорите со Лавров кажа дека Куба нема да ја промени својата политичка насока под американски притисок. Тој го осуди Вашингтон за „уривањето на меѓународниот поредок, кој веќе беше неправеден и несигурен, а сега е заменет со постапките на американската влада“.
Хавана е сојузник на Москва уште од социјалистичката револуција од крајот на 1950-тите и со децении се потпираше на Советскиот Сојуз за економска и политичка поддршка. Кремљ одржуваше блиски врски со Куба дури и по распадот на СССР, а САД воведоа санкции против Куба уште во 1960-тите.
Откако почна конфликтот во Украина во 2022 година, Москва се најде под тешки западни санкции и затоа почна да ги консолидира сојузите од советската ера, како оној со Северна Кореја. Куба не ја осуди руската офанзива во Украина, а за време на четиригодишната војна имаше недокажани тврдења дека Русија регрутира кубански борци.
Иако островот долго време се бори со недостиг од гориво, најновите американски мерки ја продлабочија кризата. Американскиот претседател Доналд Трамп ги прекина клучните испораки на венецуелска нафта за Куба по соборувањето на Николас Мадуро и се закани со санкции за земјите што продаваат нафта на Хавана.
Русија, еден од најголемите светски производители на енергија, ја разгледува можноста да ѝ помогне на Куба, а државните медиуми минатата недела објавија дека Москва би можела да испрати нафта на островот. Портпаролот на Кремљ Дмитриј Песков потврди денес дека Путин и Родригез разговарале за мерки за поддршка на Хавана. Сепак, Москва сè уште јавно не се обврзала да испрати гориво или друга многу потребна помош.
Во последните недели Путин се воздржа од остри критики кон Соединетите Држави додека продолжуваат преговорите со посредство на Вашингтон за ставање крај на четиригодишната војна во Украина. Рускиот лидер, поранешен агент на КГБ, ја посети Куба во 2014 година и притоа се сретна со револуционерниот лидер Фидел Кастро, кој почина две години подоцна.
