Повеќе од 400 припадници на безбедносните служби се распоредени додека полицијата трага по осомничениот за пукањето на Универзитетот Браун во американската сојузна држава Род Ајленд, во кое загинаа двајца студенти, а уште девет лица беа ранети во оваа престижна образовна институција, соопштија надлежните, пренесува агенцијата Ројтерс.
Универзитетот во Провиденс остана под блокада со часови откако осомничениот, вооружен со огнено оружје, влегол во зграда во која студентите полагале испити.
Надлежните не веруваат дека постои „конкретна, трајна закана“ од осомничениот, изјави доцна во саботата градоначалникот на Провиденс, Брет Смали, но со оглед на тоа што полициските служби го пребаруваат теренот и спроведуваат потера, наредбата за останување во засолниште за кампусот и околната населба засега останува во сила.
„Наредбата за останување во засолниште им овозможува на безбедносните служби да ја завршат својата работа во првата фаза од истрагата“, рече Смали.
Улиците околу кампусот беа преполни со возила на итната помош, а безбедноста беше засилена низ целиот град додека полициските служби трагаа по напаѓачот, кој сè уште не е идентификуван, соопштија надлежните. Во истрагата, заедно со локалната и државната полиција, учествуваат и агенти на Федералното истражно биро (ФБИ) и Бирото за алкохол, тутун, огнено оружје и експлозиви (АТФ).
Властите објавија снимка од осомничениот – маж, веројатно во триесеттите години, облечен во црно. Заменик-началникот на полицијата на Провиденс, Тимоти О’Хара, изјави дека е можно осомничениот да носел маска, но дека надлежните не се сигурни во тоа.
Help find this Person of Interest.
If you have any information, please call 1-800-CALL-FBI (225-5324) or https://t.co/iL7sD5efWD. pic.twitter.com/AkFDVtOCmw
— FBI (@FBI) December 14, 2025
Истражителите на местото на пукањето собрале чаури, но полицијата сè уште не е подготвена да изнесе дополнителни детали, рече О’Хара.
Напаѓачот избегал откако пукал врз студентите во училница во инженерската зграда Барус и Холи, каде што надворешните врати биле отклучени додека испитите биле во тек, соопштија надлежните. Детективите истражуваат зошто токму таа локација била цел, изјави началникот на полицијата Оскар Перес на прес-конференција.
Сите или речиси сите настрадани биле студенти, им изјави на новинарите претседателката на Универзитетот Браун, Кристина Паксон.
„Ова е ден за кој се надеваш дека никогаш нема да се случи, а се случи“, рече Паксон.
Седум од деветте ранети се во критична состојба, според податоците на здравствениот систем.
Универзитетот Браун има стотици објекти, вклучувајќи амфитеатри, лаборатории и студентски домови. Се верува дека осомничениот избегал, според наводите на локалните власти, по улица што обично е преполна со ресторани и кафулиња.
Providence Police just released video of the suspect in the Brown University shooting that killed two and injured nine.
A reporter exposed this DEI Brown University President for having no answers after 6 freaking hours
BROWN UNIVERSITY PRESIDENT: I don’t know pic.twitter.com/OohqB9Jf7x
— Sumit (@SumitHansd) December 14, 2025
Со часови под клупа
Како што се ширеше веста за пукањето, универзитетот им наложи на студентите да останат во засолниште.
Студентот на Браун Чијанг-Хенг Чијен изјави за една локална телевизија дека работел во лабораторија со уште тројца студенти кога видел порака за активен напаѓач на оддалеченост од еден блок. Околу два часа чекале под клупите, рече тој.
Гувернерот на Род Ајленд, Даниел Маки, порача дека напаѓачот ќе биде изведен пред правдата.
„Ќе се погрижиме да го фатиме лицето што им нанесе толку многу страдање на толку многу луѓе“, изјави тој.
Потрагата по осомничениот дополнително ја отежнале масите купувачи и илјадниците луѓе што присуствувале на концерти и настани во саботата навечер, изјавија локалните власти. Федералните безбедносни служби и полицијата од околните градови и општини помогнале во потрагата. Според локалните медиуми, објекти низ целиот град ангажирале дополнително обезбедување.
Полицијата прегледувала видеоснимки и ги повикувала сведоците и другите граѓани да достават информации во рамките на потрагата по осомничениот.
„Некои дојави пристигнуваа. Ги проверувавме. Засега ниту една не даде резултат“, рече О’Хара.
Претседателот на Соединетите Американски Држави Доналд Трамп им изјави на новинарите во Белата куќа дека бил информиран за ситуацијата, која ја нарече „ужасна“.
„Сè што можеме да направиме сега е да се молиме за жртвите и за оние што се многу тешко повредени“, рече Трамп.
Во споредба со многу други земји, масовните пукања во училишта, на работни места и во верски објекти се почести во САД, кои имаат едни од најлибералните закони за оружје во развиениот свет. Архивот за оружено насилство (Gun Violence Archive), кој како масовни пукања ги смета инцидентите во кои се застрелани четири или повеќе лица, годинава во САД забележал 389 такви случаи, вклучувајќи најмалку шест во училишта.
Минатата година во САД имало повеќе од 500 масовни пукања, според податоците на истиот архив.
„Онемев, но уште повеќе сум лута“, изјави студентката од втора година на Браун Зои Вајсман за Ројтерс.
Вајсман сведочела пред законодавците на сојузната држава во прилог на забрана на јуришното оружје, зборувајќи за своето искуство како средношколка во Паркланд, Флорида, каде што напаѓач во 2018 година уби 17 ученици и наставници, а други рани.
„Шокирана сум, но не сум изненадена“, рече таа.
