Игрите Милано-Кортина започнаа минатиот петок со гала церемонија на стадионот Сан Сиро во Милано, но настанот за гледачите во Италија беше засенет од низата грешки во емитувањето направени од спортскиот директор на РАИ, Паоло Петрека.
Петрека, кој се смета за близок до партијата „Браќа на Италија“ на премиерката Џорџа Мелони, ја отвори вечерта поздравувајќи ги гледачите на „Олимпискиот стадион“, кој се наоѓа во Рим, наместо на познатиот Сан Сиро. Потоа италијанската глумица Матилда де Анџелис погрешно ја претстави како американската мегаѕвезда Мараја Кери, а претседателката на Меѓународниот олимписки комитет Кирсти Ковентри ја помеша со ќерката на претседателот на Италија.
Тој не препозна две членки на исклучително успешниот италијански женски одбојкарски тим, кои го носеа олимпискиот факел, кажа дека шпанските спортисти се „секогаш многу згодни“ и дека многу кинески спортисти „природно… имаат телефони во рацете“.
Во писмо до вработените испратено во средата главниот синдикат на новинари на РАИ, Усиграи, наведе дека неговиот коментар претставувал „сериозен удар врз имиџот на РАИ и достоинството на сите новинари“.
РАИ исто така не се огласи за негодувањето, но извор од медиумската куќа кажа дека генералниот директор Џампаоло Роси одлучил да не му ја довери на Петрекa можноста да коментира за церемонијата на затворање на 22 февруари.
Спортските новинари на РАИ објавија дека, како знак на протест, ќе ги задржат своите потписи во известувањето за Олимписките игри и ќе организираат тридневен штрајк по завршувањето на Игрите.
Спорот доаѓа во време на поширока културна борба која го зафати јавниот сервис во Италија откако десничарската коалиција на Џорџа Мелони ја презеде власта во 2022 година.
Опозициските партии ја преименуваа мрежата во „ТелеМелони“, обвинувајќи ја владата дека ја полни со недоволно квалификувани лојалисти. Владините министри ги отфрлија критиките, велејќи дека РАИ со години била доминирана од левиот центар, кој, според нив, сега е незадоволен од губењето на контролата. РАИ е најголемата медиумска организација во земјата и управува со националните телевизиски, радио и дигитални новински услуги.
