„Длабоко жалиме за најавеното зголемување на американските царини за увоз на челик од 25 на 50 отсто“, се вели во соопштението на портпаролот на Европската комисија.
„Оваа одлука додава дополнителна неизвесност во глобалната економија и ги зголемува трошоците за потрошувачите и бизнисите од двете страни на Атлантикот“, рече портпаролот, додавајќи дека „зголемувањето на царините, исто така, ги поткопува сегашните напори за постигнување договорено решение“.
Портпаролот на ЕК, исто така, изјави дека Европската Унија одлучила да ги паузира контрамерките за да овозможи простор за продолжување на преговорите. „ЕУ е подготвена да воведе контрамерки, кои би ги вклучила како одговор на најновото зголемување на американските царини“, рече портпаролот.
„Европската комисија моментално ги финализира консултациите за проширени контрамерки. Доколку не се постигне заемно прифатливо решение, постојните и дополнителните мерки на ЕУ автоматски ќе стапат во сила на 14 јули, а можеби и порано доколку тоа го бараат околностите“, се вели во соопштението.
