Заклучните зборови на обвинителството и одбраната на судењето на поранешниот лидер на ОВК Хашим Тачи и тројцата сообвинети за воени злосторства во Косово и Албанија во текот на 1998-99 година, почнаа денес пред Специјалниот суд во Хаг, а главната обвинителка Кимберли Вест побара судот да им изрече казна од 45 години затвор на сите обвинети.
Османи оцени дека секој обид да се изедначи војната за ослободување на ОВК со „злосторствата на геноцидниот српски агресор“ ја поткопува довербата во правдата и го загрозува мирот.
Таа напиша на Фејсбук дека независноста на Косово е „волја на народот на Косово“ и дека „илјадници маченици и невини цивили“ ги жртвувале своите животи за таа цел.
„Геноцидот, злосторствата против човештвото и воените злосторства се дела кои Србија ги вршела против народот на Косово со векови. За време на последната војна во Косово, Србија имала цел да го уништи албанскиот народ, цел што ја постигнала со убивање и масакрирање на илјадници деца, жени, мажи и стари лица, силување на илјадници жени и мажи, уништување на стотици илјади домови, протерување на повеќе од 80 проценти од граѓаните на Косово од нивните домови, етничко чистење, присилни исчезнувања на илјадници луѓе и други ужасни злосторства“, се наведува во објавата.
Самоопределување: Политички чин, а не потрага по правда
Владејачката партија Самоопределување денес оцени дека барањето на Специјалното обвинителство во Хаг за максимални казни за поранешните офицери на таканаречената Ослободителна војска на Косово (ОВК) претставува „политички чин, а не потрага по правда“.
Самоопределување тврди дека ова барање претставува „политичка интервенција во толкувањето на историјата и обид да се префрли фокусот од агресорот кон жртвата“.
Беше оценето дека Југославија и Србија под водство на Слободан Милошевиќ „извршиле геноцид во Косово и дека ОВК се борела против геноцидни планови и дејствија, бранејќи го албанскиот народ“.
„Обидите да се прикаже ОВК како криминална организација имаат за цел криминализирање на ослободителната борба и нејзино деполитизирање, сведувајќи го на поединечни кривични дела (…) Злосторствата против човештвото бараат државен апарат и систематски механизми на насилство, какви што ОВК никогаш немала“, се наведува во соопштението.
Партијата го критикуваше и Специјалниот суд, наведувајќи дека тој е производ на политички притисоци и геополитички интереси и дека правдата не може да биде селективна и еднострана.
„Ослободувањето не е злосторство, историјата на Косово не може да се препишува преку обвиненија што му служат на наративот на агресорот. Вистинската правда бара признавање на легитимитетот на борбата за слобода и идентификување на органите на геноцидното насилство (…) Изедначувањето на ослободителната борба со злосторствата на геноцидните режими е искривување на историјата и релативизација на српската агресија“, порача Самоопределување.
