Според соопштението на Комисијата, инцидентот се случил на состанокот на Европскиот совет на 19 декември 2024 година, на кој присуствувал и Зеленски. Преведувачот, спротивно на правилата, водел писмени белешки за време на затворена седница на која се дискутирале чувствителни теми како што се одбраната и безбедноста.
„Белешките веднаш се одземени“, се вели во одговорот на Комисијата. „По внимателна анализа на фактите, презедовме соодветни мерки за да спречиме повторување на овој инцидент.“
Во конкретниот случај беше одлучено услугите на тој преведувач повеќе да не се користат, се наведува понатаму во соопштението.
Според францускиот весник Ле монд, кој прв објави за случајот, преведувачот бил хонорарец од француско-украинско потекло, ангажиран да помогне во комуникацијата со украинскиот претседател за време на состанок на високо ниво.
Целиот случај, наводно, сега е предаден на белгиските власти. Тие сè уште не дале коментар за истрагата, ниту дале дополнителни информации.
Брисел во последниве години се справува со низа случаи поврзани со шпионажа. Во ноември минатата година, Политико доби порака испратена до вработените во Европската комисија во која се предупредува на „реална закана“ од странски агенти.
„Брисел е еден од најголемите шпионски центри во светот, со неколку стотици активни разузнавачки агенти кои ги напаѓаат нашите институции“, се вели во пораката.
Минатата година, Европскиот парламент ја санкционираше поранешната латвиска европратеничка Татјана Жданока откако медиумските извештаи открија дека таа наводно соработувала со руската Федерална служба за безбедност (ФСБ), наследникот на советскиот КГБ. Откритието дополнително ги зголеми стравувањата од руско влијание и шпионски операции во институциите на ЕУ.
