Документите, кои содржат приватна преписка по електронска пошта, покажуваат дека Сулајем и Епстин одржувале блиска комуникација со години откако Епстин првпат бил осуден за сексуални кривични дела.
Од Куранот до „свежа, стопроцентна Русинка“
Посебно внимание во јавноста привлече една преписка од јуни 2013 година, која покажува неверојатен контраст во темите за кои разговарале двајцата моќници.
Во електронска порака со наслов „Дали Куранот вели да немате Евреи и христијани за пријатели?“, Сулајем влегува во теолошка расправа со Епстин. Му ги толкува верските текстови и нагласува дека Куранот дозволува бракови со „христијанки и Еврејки“ и дека нема логика да се забранува пријателство со нив.
Меѓутоа, тонот драстично се менува во завршниот дел од одговорот на Сулајем, каде што теолошката расправа преминува во вулгарно фалење.
Сулајем му пишува на Епстин: „Ти благодарам, пријателе. Одам да пробам свежа, стопроцентна Русинка на својата јахта“.
Епстин му одговара со ласкави зборови: „Она што сигурно го знам е дека ти си еден од моите најдоверливи пријатели во секоја смисла на зборот. Никогаш не ме изневери, ниту еднаш, целосна лојалност“.
Обука за „масерка“ во Турција
Освен оваа преписка, Фајненшл тајмс наведува дека документите откриваат како челникот на ДП ворлд помогнал во организирање обука за руска „масерка“ од „приватниот спа-центар“ на Епстин.
Според електронски пораки од 2017 година, Сулајем посредувал девојката да биде испратена во хотелот Риксос во Анталија, Турција, за да „стекне подобро искуство“. Епстин во преписката нагласил дека сака таа „да научи што е можно повеќе“.
Документите откриваат и други вознемирувачки пораки. Во една размена од 2016 година, Епстин му напишал на Сулајем кратка порака: „Ниту една девојка во Дубаи вечерва не е безбедна“.
Контекстот на оваа порака во документите не е целосно разјаснет. Исто така е забележано дека Сулајем во 2015 година му испратил на Епстин врска до порнографска страница за време на договарање посета на Санта Фе, каде што Епстин поседувал ранч.
Долгогодишно пријателство и покрај пресудите
Овие документи ќе бидат исклучително непријатни за ДП ворлд, компанија во сопственост на владата на Дубаи, која вработува повеќе од 100.000 луѓе низ светот и управува со големи пристаништа, вклучително и инвестиции во Лондон, како и низ Африка и Азија.
Претходните откритија веќе укажуваа на врски меѓу Сулајем и Епстин, но новите документи ја покажуваат длабочината на нивната соработка. Епстин уште во 2010 година го нарекувал Сулајем „близок личен пријател“ кого го познава повеќе од осум години.
Џефри Епстин се самоуби во затвор во 2019 година, чекајќи судење за трговија со луѓе заради сексуална експлоатација.
Неговата соработничка Гислејн Максвел беше осудена на 20 години затвор поради нејзината улога во подведување малолетнички. Од компанијата ДП ворлд одбија да ги коментираат овие наводи за странските медиуми.
