Нафтоводот Дружба испорачува руска нафта на Унгарија и Словачка, кои продолжуваат да купуваат енергија од Русија откако другите земји од ЕУ престанаа да увезуваат руска нафта и гас по руската инвазија на Украина во 2022 година.
Европската комисија ќе предложи да се забрза постепеното укинување на увозот на фосилни горива од Русија, изјави вчера претседателката на Европската комисија Урсула фон дер Лаен, по телефонскиот разговор со американскиот претседател Доналд Трамп.
ЕУ првично планираше да престане да увезува руски гас и нафта до 1 јануари 2028 година.
Полскиот министер кажа дека ова требало да се случи две години порано, особено имајќи ги предвид неодамнешните настани како што е упадот на беспилотните летала на полска територија минатата недела, за кои Варшава тврди дека се руски без да понуди докази.
„Ве поканувам да се согласите за заедничката цел за целосно прекинување на увозот на руска сурова нафта до крајот на 2026 година“, им пиша Мотика на министрите за енергетика на ЕУ.
Според него, „таквата одлука би ја зајакнала конзистентноста на нашите дејствија, би поставила јасна временска рамка и би ја покажала нашата решеност да станеме независни од снабдувањето со нафта, што претставува политички и стратегиски ризици“.
Словачка и Унгарија сè уште зависат од руските извори на енергија.
Војчех Врочна, заменик министер на Мотика, кажа дека американскиот течен природен гас испорачан преку Полска би можел да помогне во елиминирањето на рускиот гас од Европа.
Тој денес се сретна со американскиот министер за енергетика Крис Рајт.
