Разговорот се одржа како дел од виртуелниот состанок организиран од Германија во средата, со цел усогласување на американските и европските позиции пред самитот на Трамп со рускиот претседател Владимир Путин во петок.
Тројцата соговорници – европски дипломат, британски функционер и лице запознаено со содржината на повикот – рекоа дека САД се подготвени да играат одредена улога во обезбедувањето средства за Киев за одвраќање на идната руска агресија, доколку се постигне договор за прекин на огнот. Лице запознаено со содржината на повикот кажал дека Трамп рекол дека ќе преземе таква обврска само ако напорите не се дел од НАТО.
Подготвеноста на Трамп за такви гаранции – клучно барање и од Украина и од Европа – делумно го објаснува претпазливиот оптимизам што го изразуваат европските претставници по разговорите и пред состанокот во петок, пишува Политико. Трамп не прецизирал што точно мисли под безбедносни гаранции и зборувал само за поширок концепт, според соговорникот на бриселскиот медиум.
Британски функционер изјавил дека Трамп признава дека безбедносната гаранција на САД мора да биде дел од конечниот договор и ги гледа САД како актер во тој процес.
Белата куќа не одговорила веднаш на барањето за коментар за подготвеноста на Трамп САД да играат улога во безбедносните гаранции.
Без оглед на формата на гаранциите, Трамп јасно стави до знаење дека САД нема да продолжат директно да испраќаат оружје или војници во Украина, иако ќе продаваат оружје на Европа што би го користел Киев. Исто така, тие гаранции веројатно ќе бидат ограничени по обем – што сигурно ќе ги разочара поддржувачите на Украина кои сакаат посилни гаранции од Вашингтон за да спречат уште една руска инвазија по завршувањето на борбите.
Иако европските и украинските функционери веруваат дека Трамп го послушал нивниот совет и работи на посредување за прекин на огнот, тие остануваат претпазливи за тоа што може да се случи кога Трамп и Путин ќе бидат сами во разговорите.
Иако Европа се обидува да најде решенија за безбедносни гаранции без САД – како што е формирање коалиција од подготвени копнени сили за да се помогне во одбраната на евентуалниот мировен договор – тие сепак сакаат американска поддршка за тие напори.
Трамп се спротивставуваше на обезбедувањето смртоносна воена помош за Украина во поголемиот дел од своето претседателствување. Иако САД не испраќаат оружје директно, неодамна ѝ дозволија на Европа да купува американско оружје и да го испраќа во Украина – потег за кој неговата администрација вели дека го зголемил притисокот врз Москва и го убедил Путин да се согласи на разговори.
