Хрватскиот премиер напиша на платформата Икс дека на состанокот меѓу американскиот претседател Доналд Трамп и рускиот Владимир Путин во петок во Алјаска, потребно е да се постигне договор за прекин на огнот како предуслов за почеток на сериозен мировен процес во кој ќе учествува Украина.
Украинскиот претседател Володимир Зеленски и европските земји, иако ја поздравуваат средбата меѓу Путин и Трамп во Енкориџ, истакнуваат дека мирот во Украина не може да се реши без Киев.
Пленковиќ ја повтори важноста на почитувањето на меѓународното право и територијалниот интегритет и обезбедувањето безбедносни гаранции и поддршка на Украина, како и дополнителни санкции против Русија.
„Неопходно е да се постигне праведен и одржлив мир кој не смее да ја понижува жртвата и да го наградува агресорот, бидејќи агресијата на Русија против Украина има пошироки последици за европската и светската безбедност“, рече премиерот.
Неформалното име „коалиција на спремните“ се однесува на група европски земји, заедно со Австралија, Канада и Нов Зеланд, кои се залагаат за испраќање мировни сили на истокот од Украина како безбедносна гаранција по постигнувањето мир меѓу Киев и Москва.
Хрватска е дел од таа коалиција, но властите постојано повторуваат дека нема да ги испраќаат своите војници во Украина.
