Тврдењата дека Русија извршила напади врз нуклеарните постројки не се точни, изјави прес-секретарот на претседателот, Дмитриј Песков.
„Немам прецизни информации за Чернобил. Знам едно: не може да се зборува за напади врз објекти на нуклеарна инфраструктура, инфраструктура за нуклеарна енергија. Затоа, сите тврдења дека тоа било така не се точни. Руската војска не го прави ова. Најверојатно, зборуваме за уште една провокација, манипулација. Токму тоа го сака режимот во Киев и понекогаш, всушност, не се двоуми да го направи“, рече тој.
На прашањето дали Кремљ нападот во Чернобил го смета за обид за прекин на преговорите, Песков одговори дека во Украина има противници на преговорите што ќе направат сѐ за да ги нарушат. „Сигурно, во длабочините на режимот во Киев ќе има такви што ќе продолжат да се спротивставуваат на какви било обиди за започнување на преговарачкиот процес, ова е очигледно. И очигледно е дека овие луѓе ќе направат сѐ за да се обидат да го нарушат овој процес“, рече прес-секретарот на претседателот.
Утрово Меѓународната агенција за атомска енергија (ИАЕА) на својата страница на Икс објави за напад со беспилотно летало врз нуклеарната централа Чернобил.
„Ноќта на 14 февруари, околу 1:50 часот, тим на ИАЕА што работеше на локацијата во Чернобил слушна експлозија во близина на НСК (заштитна структура во облик на лак) што ги штити остатоците од единицата 4 на поранешната нуклеарна централа Чернобил, што предизвика пожар. Им беше кажано дека на покривот се урнал дрон“, соопшти ИАЕА.
During the night of 13-14 Feb, at around 01:50, IAEA team at the Chornobyl site heard an explosion coming from the New Safe Confinement, which protects the remains of reactor 4 of the former Chornobyl NPP, causing a fire. They were informed that a UAV had struck the NSC roof. pic.twitter.com/Ee5NSRgDo8
— IAEA – International Atomic Energy Agency ⚛️ (@iaeaorg) February 14, 2025
Украинскиот претседател Володимир Зеленски исто така информираше за нападот со беспилотно летало врз нуклеарната централа Чернобил. Според него, штетата на саркофагот е значителна. „Во моментов, радијацијата не е зголемена и тоа постојано се следи“, напиша тој на каналот Телеграм. Украинскиот претседател ја обвини Русија за тоа што се случи.
