Регионалната воена управа на Шуми соопшти дека се повредени уште четири лица. Лекари, полиција и други служби за итни случаи моментално се на местото на настанот. Нападот се случи само неколку часа откако Русија и Украина ги одржаа своите први директни мировни преговори од 2022 година.
„Како резултат на напад на непријателски беспилотно летало во автобус во близина на Билопиље, девет лица загинаа, четворица се повредени“, се вели во соопштението на регионалната воена управа. Се додава дека автобусот се движел кон Суми, главниот град на регионот.
Гувернерот Олех Хрихоров во видео порака го опиша рускиот напад како „нехуман“. Повикувајќи се на прелиминарни информации, тој рече дека автобусот бил погоден од руско беспилотно летало Лансет во саботата во 06:17 часот по локално време.
Украинската полиција објави фотографии од речиси уништено темно сино патничко возило, со откорнат покрив и скршени прозорци. Двете страни негираат дека нападите се насочени кон цивили, иако илјадници луѓе веќе загинаа во конфликтот, од кои огромното мнозинство се Украинци.
„Ова не е само уште едно гранатирање, ова е цинично воено злосторство“, напиша украинската национална полиција во објава на Телеграм.
Руската државна новинска агенција ТАСС објави, повикувајќи се на соопштение на Министерството за одбрана, дека руските сили со беспилотни летала нападнале област за собирање на украинската воена опрема во регионот Суми.
За време на вчерашните преговори во Истанбул, не беше постигнат значаен напредок кон завршување на војната. Се покажа дека разликите меѓу двете спротивставени страни се сè уште непремостливи. Сепак, беше договорена голема размена на воени заробеници.
