„Во моментов има многу сериозни вести, израелски напад врз некои лидери на Хамас во Катар“, изјави папата пред новинарите пред неговата летна резиденција во Кастел Гандолфо. „Целата ситуација е многу сериозна“, рече Лео. „Не знаеме во која насока ќе се развиваат работите. Многу е сериозно“, додаде тој.
Папата Лео го користи попретпазливиот дипломатски речник на Ватикан, за разлика од неговиот претходник, папата Франциско, но сè повеќе ја критикува воената кампања на Израел во Газа. Папата минатата недела се сретна со израелскиот претседател Исак Херцог во Ватикан, по што Ватикан соопшти дека Лео изразил жалење на состанокот поради „трагичната ситуација во Газа“.
Лео зборуваше денес по извештаите за израелскиот напад во Доха, за кој Израел рече дека бил насочен кон лидерите на Хамас, вклучувајќи го и Халил ал-Хаја, еден од врвните лидери и преговарачи на групата. „Мора да продолжиме да работиме и да инсистираме на мир“, им рече папата на новинарите, кои го замолија да коментира за ситуацијата во Газа.
Папата рече дека се обидел да го повика пасторот на единствената католичка црква во Газа, Габриел Романели, кој често разговараше со Франциско. Ватикан претходно не соопшти дали папата лично разговарал со Романели. Лео го помина денот во Кастел Гандолфо, на околу еден час возење јужно од Рим, и се врати во Ватикан доцна попладнево.
