Папата, имено, зборуваше за прикажување на војната како да е видеоигра – само неколку дена откако Белата куќа вметна слики од видео игри во својата воена пропаганда за Иран.
Обраќајќи се пред персоналот на италијанската државна телевизија ТГ2 на 16 март, папата кажа дека новинарите треба да „го покажат страдањето што војната секогаш им го носи на луѓето; да го покажат лицето на војната и да го раскажат преку очите на жртвите, за да не се претвори во видеоигра“.
„Секогаш, а особено во драматичните околности на војната, какви што моментално доживуваме, медиумите мора да се чуваат од опасноста да станат пропаганда“, кажа Лео. „А задачата на новинарите, во проверката на вестите за да не станат портпароли на оние на власт, станува уште поитна и деликатна – би рекол, клучна“.
Коментарите на папата следат по сличната осуда од кардиналот од Чикаго Блејс Купич, кој објави соопштение во кое ја осудува употребата на снимки од акциони филмови и видео игри во воената пропаганда на администрацијата на Трамп.
„Откако повеќе од 1.000 ирански мажи, жени и деца беа убиени по бомбардирањата со американски и израелски ракети, официјалниот профил на Белата куќа на Икс во четврток вечерта објави видео со сцени од популарни акциони филмови, споени со вистински снимки од нападот од нивната војна против Иран. Видеото беше придружено со порака: „ПРАВДА НА АМЕРИКАНСКИ НАЧИН““, напиша Купич на 7 март. „Вистинска војна со вистинска смрт и вистинско страдање што се третира како видеоигра – тоа е одвратно“, додаде тој.
Неговата изјава беше споделена дури и од некои конзервативни профили на социјалните медиуми, истакнувајќи ги религиозните поделби што војната на Трамп ги поттикна во рамките на движењето „Америка повторно голема“. Ваквите апели на совеста би можеле да се покажат како доста резонантни, со оглед на тоа што смртоносната војна на Трамп зема сè голем данок од економијата и се соочува со широко распространета непопуларност во Соединетите Држави.
