Американските цариници во саботата почнаа да ги наплатуваат Трамповите еднострани царини од 10 отсто за сите увозни производи од повеќе од 180 земји. Повеќе „реципрочни“ царински стапки, кои се движат од 11 до 50 отсто за одделни земји, треба да стапат во сила в среда.
Во меѓувреме, терминските индекси на Волстрит се во минус за околу 4 отсто, што укажува дека „колежот“ на пазарите, кој ги погоди светските берзи во четвртокот и петокот, ќе продолжи и денеска, пишува Ројтерс.
Азиските берзи во почетокот на денешното тргување повторно остро паднаа, при што индексот на најголемата азиска берза, Токиската, потона за осум отсто.
Во неделата навечер падна и цената на биткоинот.
Сѐ помрачните изгледи за глобалниот економски раст поради трговската војна ги сменија и цените на нафтата во неделата, покрај нивниот остар пад минатата недела. Како што расте загриженоста дека царините би можеле да доведат до повисоки цени за компаниите, се смета дека тоа би можело да ја забави економската активност и на крајот да ѝ наштети на побарувачката на нафта.
Терминските цени на американската сурова нафта во неделата вечер паднаа за повеќе од три отсто до 59,74 долари за барел, откако минатата недела потонаа за шест отсто, на најниското ниво од април 2021 година. Цената на барелот брент на лондонската берза падна за 2,12 долари, на 63,46 долари.
Падна дури и цената на златото, кое се сметаше за безбедно засолниште за капиталот во неизвесни времиња. Цената на унца злато се намали за 0,6 отсто, на 3.018 долари.
„Големината и разорниот ефект на американската трговска политика, доколку се одржат, ќе бидат доволни за да ја втурнат сè уште здравата американска и глобална експанзија во рецесија“, рече Брус Касман од ЏП Морган, ставајќи го ризикот од рецесија на високи 60 проценти.
Дали доларот повеќе не е безбедно засолниште за капиталот?
Во понеделникот, инвеститорите продолжија да го продаваат доларот и да купуваат традиционално сигурни валути во несигурни времиња – јенот и швајцарскиот франк. И американскиот долар вообичаено се смета за безбедно засолниште, но тој статус се чини дека слабее бидејќи неизвесноста околу царините и загриженоста за нивното влијание врз економскиот раст на САД се интензивираат.
„Со САД во епицентарот на трговската војна, американскиот долар страда од одлив на капитал, при што инвеститорите бараат да се диверзифицираат подалеку од американските средства“, рече Родриго Катрил, висок валутен стратег во Националната австралиска банка.
