Њу Делхи претходно ги редуцираше дипломатските односи со Исламабад и го суспендираше договорот за користење на водите на системот на реката Инд од страна на двете нации.
„Пакистан жестоко ја отфрла индиската најава да го прекине Договорот за водите на Инд… Секој обид да се запре или пренасочи протокот на вода што му припаѓа на Пакистан според Договорот за водите на Инд… ќе се смета како акт на војна и ќе се одговори со полна сила“, се вели во соопштението од кабинетот на премиерот Мухамед Шехбаз Шариф. Договорот не содржи одредба за еднострано суспендирање, истакна тој.
Индија и Пакистан денеска меѓусебно ги откажаа и визите за државјаните, поради зголемените тензии меѓу двата нуклеарно вооружени соседи, откако Индија го обвини Пакистан за смртоносниот напад на вооружени напаѓачи во кој загинаа 26 луѓе, главно туристи, во спорниот Кашмир.
Индиските власти соопштија дека сите визи издадени на пакистански државјани ќе бидат укинати од недела, додавајќи дека сите Пакистанци што моментално се во Индија мора да заминат пред да им истечат визите врз основа на ревидираната временска рамка. Земјата најави и други мерки, вклучително и намалување на бројот на дипломатскиот персонал и затворање на единствениот функционален копнеен граничен премин меѓу земјите.
За возврат, Пакистан го затвори својот воздушен простор за сите авиокомпании поврзани со Индија и ја суспендираше сета трговија со земјата, вклучително и кон и од која било трета земја.
Исламабад дополнително ги прогласи индиските советници за одбрана, морнарички и воздухопловни сили со седиште во пакистанската престолнина за персона нон грата. Тој, исто така, нареди намалување на персоналот во индиската висока комисија во Исламабад на 30 дипломати и персонал, од 30 април.
Мерките се одраз на оние преземени од Њу Делхи во средата. Потегот дојде како одговор на бруталниот напад во регионот Кашмир под управа на Индија, во кој загинаа 26 лица – повеќето туристи – и беа повредени десетици други. Нападот се случи во вторникот попладне во долината Баисаран, живописна дестинација во Пахалгам позната како „мини Швајцарија“. Фронтот на отпорот, милитантна група за која се верува дека е поврзана со пакистанската Лашкар-е-Таиба, наводно ја презела одговорноста.
