Нудејќи зачудувачки отворен увид во филозофијата што ги раководи препораките за вакцини под администрацијата на Трамп, лидерот на федералниот панел што препорачува вакцини за Американците изјави дека вакцините против полио и мали сипаници — а можеби и против сите болести — не треба да бидат задолжителни и дека треба да се нудат само по консултација со лекар.
Д-р Кирк Милхоун, педијатриски кардиолог што е претседател на Советодавниот комитет за имунизациски практики, изјави дека е „загрижен“ оти некои деца би можеле да умрат од мали сипаници или да останат парализирани од полио како последица на одлуката да не се вакцинираат. Но, додаде тој, „исто така сум тажен кога луѓе умираат од болести поврзани со алкохол“, дополнувајќи: „Слобода на избор и лоши здравствени исходи.“
Во случај на заразна болест, личната одлука да се одбие вакцина може да влијае и врз други, вклучително и доенчиња што се премлади за вакцинација или лица со ослабен имунитет. Но правото на поединецот да ја одбие вакцината ги надминува тие ризици, рече д-р Милхоун.
„Ако нема избор, тогаш информираната согласност е илузија“, рече тој. „Без согласност, тоа е медицински напад.“
Вакцините против полио и мали сипаници нашироко се признаени како огромни успеси на јавното здравје, заслужни за спречување инвалидитет и милиони смртни случаи низ целиот свет, вели Њујорк тајмс.
Но д-р Милхоун рече дека правењето на вакцините незадолжителни, наместо нивно задолжително барање за влез во јавните училишта на национално ниво, како што е случај сега, на крајот би ја вратило довербата во јавното здравје.
Надворешни експерти остро го критикуваа д-р Милхоун, велејќи дека промените во вакциналната политика што ги предлага би довеле до непотребни смртни случаи кај децата.
„Тој нема поим за што зборува“, рече д-р Шон О’Лири, претседател на комитетот за заразни болести при Американската академија за педијатрија.
„Овие вакцини ги штитат децата и спасуваат животи“, додаде д-р О’Лири. „Многу е фрустрирачки за оние од нас што ги поминуваат кариерите обидувајќи се да го подобрат здравјето на децата да гледаат како им се нанесува штета поради идеолошка агенда што не е заснована на наука.“
Д-р Милхоун вели дека полиото и малите сипаници повеќе не се закана каква што некогаш биле во Соединетите Американски Држави поради напредокот во медицината и санитарните услови, а не само поради вакцините, повторувајќи изјави на министерот за здравство Роберт Ф. Кенеди Помладиот. Се опиша себеси како некој што „ја подига завесата“ за ризиците од вакцините.
Потоа тој дополнително го образложи својот став дека личната автономија е најважна. Комитетот за вакцини можеби „не мора нужно“ да препорача сите вакцини да бидат незадолжителни, додаде тој, но е задолжен за „повторна проценка на сите вакцинални производи, вклучително и ризиците и придобивките“, и би можел да направи значајни промени во списокот на детски вакцини во текот на наредната година.
Кенеди и неговиот тим претставија распоред што го намалува бројот на препорачаните имунизации од 17 на 11 и советуваат шесте исфрлени вакцини да се даваат само под „заедничко клиничко донесување одлуки“, односно по консултација со здравствен работник.
Портпаролот на Министерството за здравство и социјални услуги одби да ги коментира ставовите на д-р Милхоун, вели ЊТ.
Засега, сојузните држави и осигурителните компании продолжуваат да го следат претходниот распоред за вакцинација, кој и натаму го поддржуваат Американската академија за педијатрија и други медицински организации. Сите 50 сојузни држави и Федералниот округ Колумбија бараат децата да бидат вакцинирани против поголем дел од 17-те болести за да посетуваат јавни училишта.
Д-р Хелен Чу, експертка за вакцини на Универзитетот во Вашингтон во Сиетл и поранешна членка на АЦИП, рече дека целата теза за конфликт меѓу индивидуалниот избор и јавното здравје е лажна.
„Точно е дека вакцинираните лица имаат помала веројатност да ги заразат другите, но примарната причина за примање вакцина е да се заштитите себеси“, рече таа.
Ноел Бруер, експерт за вакцини и поранешен член на комитетот, рече дека д-р Милхоун изгледа не ја разбира целта на комитетот за вакцини.
„АЦИП дава препораки за тоа што е најдобро за целата популација“, рече д-р Бруер. Што се однесува на индивидуалната автономија, тој истакна дека сите вакцини и сега се даваат со согласност на пациентот.
„За мене, автономија значи да можам моите деца да ги однесам во продавница или во градинка без да ги демне болест што може да се спречи со вакцина и што може да ги убие“, додаде тој. „Обезбедувањето висока покриеност со вакцини преку барањата за влез во училиште ги штити моето дете и другите деца.“
