Орбан се осврна на самитот ЕУ-Западен Балкан одржан во средата, кој, како што кажа, бил подготвен на таков начин што српскиот претседател не ни дошол. Според него, ова не е изненадување бидејќи Србија, која е кандидат за членство од 2012 година, е „блокирана“ со години без конкретен напредок во пристапувањето, со изговори за проблеми со владеењето на правото. Унгарскиот премиер направи паралела со Украина, каде што претставниците на Брисел, како што забележа, не нашле слични пречки.
„Претседателот Вучиќ добро направи што не учествуваше во овој настап. Срамно е за Унијата и за бриселските бирократи кои го свикаа самитот што значаен дел од земјите-членки дури и не дојдоа во Брисел вчера“, кажа Орбан.
Коментирајќи ги денешните настани, тој истакна дека ароганцијата продолжува. „Бирократите се колнат дека не можеме да си одиме дома додека не се реши финансирањето на Украина. Односно, финансирањето на војната“, напиша Орбан, цврсто наведувајќи дека Унгарија нема да учествува во неа.
„Ќе бидеме тука колку што е потребно. Неколку непроспиени ноќи не се крај на светот. Тоа е секако подобро од војна“, заклучи унгарскиот премиер.
