Поранешниот претседател и поранешната прва дама објавија долго соопштение за смртоносното пукање и ги осудија агресивните мерки за спроведување на имиграциските закони во Минесота. Обамовци ја повикаа администрацијата на Трамп да го преиспита својот пристап.
„Убиството на Алекс Прети е страшна трагедија. Но тоа треба да биде и повик за будење за секој Американец, без оглед на партиската припадност, бидејќи многу од нашите темелни вредности како нација сè повеќе се под напад“, стои во објавата на Икс.
The killing of Alex Pretti is a heartbreaking tragedy. It should also be a wake-up call to every American, regardless of party, that many of our core values as a nation are increasingly under assault. pic.twitter.com/0JmEsJ1QFW
— Barack Obama (@BarackObama) January 25, 2026
„Федералните полицајци и имиграциските агенти имаат тешка работа. Но Американците очекуваат тие своите должности да ги извршуваат законито и одговорно и да соработуваат со сојузните држави и локалните власти, а не да дејствуваат против нив, за да се обезбеди јавната безбедност“, напишаа тие. „Тоа не е она што го гледаме во Минесота. Всушност, го гледаме спротивното“, порачаа.
Соопштението претставува редок случај Обамовци јавно да се огласат против постапките на администрацијата на Трамп.
„Наместо да се обидат да воведат барем некакво ниво на дисциплина и одговорност меѓу агентите што ги распоредија, се чини дека претседателот и сегашните функционери на администрацијата сакаат дополнително да ја ескалираат ситуацијата“, напишаа тие, додавајќи дека администрацијата понудила објаснувања за пукањата во кои беа убиени Прети и Рене Гуд, која беше убиена претходно месецов, „кои не се темелат на никаква сериозна истрага — и кои се чинат директно спротивни на видеодоказите“.
Мишел и Барак Обама ги пофалија мирните протести во Минеаполис и низ целата земја, нарекувајќи ги „навремен потсетник дека, на крајот, на секого од нас како граѓанин му припаѓа одговорноста да го крене гласот против неправдата, да ги заштити своите темелни слободи и да ја повика власта на одговорност“.
