Анкетата е спроведена помеѓу 13 и 28 ноември, неколку дена откако Украина беше погодена од големиот корупциски скандал во кој се вклучени сојузниците на Зеленски. Во октомври, еден месец пред да избувне аферата, поддршката за Зеленски изнесуваше 24,3 проценти.
Резултати од анкетата:
Володимир Зеленски – 20,3 проценти
Валериј Залужни – 19,1 процент
Кирило Буданов – 5,1 процент
Поранешниот командант на украинските вооружени сили, а сега амбасадор на Украина во Обединетото Кралство, Валериј Залужни е на второто место со поддршка од 19,1 процент, што е зголемување од три процентни поени во споредба со октомври.
Шефот на украинската воено-разузнавачка служба Кирил Буданов се најде на третото место со 5,1 процент поддршка. Околу 23,6 проценти од испитаниците не знаеле како да одговорат или одбиле да дадат одговор.
Во хипотетичко сценарио за парламентарни избори, 21,8 проценти од анкетираните кажале дека би ја поддржале сè уште непостоечката партија предводена од Залужни, додека партијата на Володимир Зеленски би освоила 11,5 проценти од гласовите.
И Залужни и Буданов ја отфрлаат или игнорираат можноста за влегување во политиката. Истражувањето е спроведено преку телефонска анкета на примерок од 1.000 Украинци на возраст од 16 години и повеќе.
Кога ја презеде функцијата претседател во 2019 година, Зеленски беше поддржан од околу 80 проценти од Украинците. До февруари 2022 година, таа бројка падна на 37 проценти, само за нагло да скокне на 90 проценти по почетокот на конфликтот.
Анкета на Меѓународниот институт за социологија во Киев (КИИС) спроведена претходно оваа есен покажа дека 60 проценти од Украинците сè уште му веруваат на Зеленски, додека 35 проценти немаат доверба. Истата анкета покажа дека само 25 проценти од граѓаните веруваат дека Зеленски треба да остане на функцијата по завршувањето на војната.
Според украинскиот устав избори можат да се одржат само по завршувањето на воената состојба, која беше прогласена на почетокот на руската инвазија во 2022 година. Зеленски во септември кажа дека е отворен за можноста да не се кандидира повторно по војната.
Американскиот претседател Доналд Трамп во интервју за Политико изјави дека е време Украина да одржи избори. Неговата изјава доаѓа во време кога Вашингтон го засилува притисокот врз Киев да преговара за мировно решение за да се стави крај на војната со Русија.
