Неколку земји, вклучувајќи ги Израел, Пакистан и Камбоџа, го номинираа Трамп за посредувањето во мировни договори или прекин на огнот, а тој кажа дека го заслужува признанието што го добија четворица негови претходници во Белата куќа.
„Сосема неочекувано, додека министерот за финансии Јенс Столтенберг шетал по улици во Осло, Доналд Трамп му се јавил. Тој ја сака Нобеловата награда – и да разговара за царините“, објави „Дагенс нарингслив“, повикувајќи се на неименувани извори.
Во изјава за Ројтерс, Столтенберг кажа дека повикот бил за царинска и економска соработка, пред разговорот на Трамп со норвешкиот премиер Јонас Стерео.
„Нема да навлегувам во дополнителни детали за содржината на разговорот“, додаде тој.
Во повикот беа вклучени неколку претставници на Белата куќа, вклучувајќи го и секретарот за финансии на САД, Скот Бесант, и трговскиот претставник на САД, Џејмисон Грир, додаде Столтенберг.
Белата куќа и Норвешкиот Нобелов комитет не одговорија на барањата за коментар.
Секоја година, номинациите за стотици кандидати ги разгледува норвешкиот Нобелов комитет, чии пет члена ги назначува норвешкиот парламент, во согласност со тестаментот на шведскиот индустријалец од 19 век, Алфред Нобел.
Добитниците се објавуваат во октомври во Осло, главниот град на Норвешка.
Норвешкиот весник објави дека не е прв пат Трамп да ја спомене наградата во разговор со Столтенберг, поранешниот генерален секретар на воениот пакт НАТО.
На 31 јули, Белата куќа објави воведување царина од 15 отсто за увоз од Норвешка, што е исто како и за Европската унија.
Столтенберг во средата изјави дека Норвешка и САД сè уште преговараат за царините.
