Фондацијата што го носи нејзиното име соопшти дека Мохамади била уапсена за време на комеморација за адвокат за човекови права, кој неодамна бил пронајден мртов.
Иран засега не се огласи во врска со ова апсење.
Поддржувачите на Мохамади со месеци предупредуваа дека постои ризик таа повторно да биде уапсена, откако беше пуштена од затвор во декември 2024 година од здравствени причини.
Иако требаше да биде на слобода само три недели, таа остана подолго, најверојатно затоа што активистите и западните држави вршеа притисок врз Иран да ѝ се дозволи да остане на слобода.
Мохамади го продолжи својот активизам преку јавни протести и настапи во странски медиуми, меѓу другото и со демонстрации пред техеранскиот затвор „Евин“, каде што претходно беше затворена.
