Врските на Чомски со Епстин станаа предмет на јавна дебата откако Министерството за правда објави електронски пораки и други документи што покажуваат дека тие биле во пријателска комуникација и по признавањето на вината на Епстин во 2008 година. Во една порака од 2019 година, Чомски му советувал на Епстин да ги игнорира медиумските напади поради обвиненијата за трговија со луѓе заради сексуална експлоатација, оценувајќи дека јавниот одговор само би предизвикал нов бран напади.
Иако дел од таа комуникација се одвивала по објавувањето на истражувачката сторија на Мајами хералд во 2018 година, во која детално беа опишани злосторствата на Епстин, Чомски тврди дека не бил свесен за вистинските размери на тие дела сè до второто апсење на Епстин во јули 2019 година. Подоцна, пред да доживее тежок мозочен удар во 2023 година, Чомски изрази жалење што воопшто стапил во контакт со човек што водел „скриен живот на криминални и нечовечки дела“.
Објавените документи покажуваат дека Чомски и Епстин се сретнувале на вечери и академски собири во Њујорк, Париз и Ново Мексико, но дека Чомски никогаш не бил на приватниот остров на Епстин и не знаел што се случувало таму. Дел од преписката вклучува и пофалби за „редовниот контакт“ со Епстин, како и неформални, дури и несоодветни пораки.
Се појаснува и дека имало ограничени финансиски трансакции меѓу двајцата: исплата од 20.000 долари поврзана со лингвистички предизвик и помош за враќање на средства од пензиски фонд, при што Епстин дејствувал само како советник, без пристап до личните сметки на Чомски.
Случајот повторно ги отвори прашањата за одговорноста на јавните личности што одржувале односи со Епстин и за тоа колку навистина знаеле за неговите злосторства, кои станаа целосно јасни дури по неговото апсење и смрт во 2019 година.
