Зеленски се среќава со Трамп еден ден откако имаше двочасовен телефонски разговор со рускиот претседател Владимир Путин за војната во Украина.
Во последните денови, Трамп покажа спремност да ѝ продаде крстосувачки ракети томахавк со долг дострел на Украина, иако Путин предупреди дека тоа дополнително ќе ги затегне односите меѓу Вашингтон и Москва.
Но по вчерашниот разговор со Путин, Трамп ја намали можноста Украина наскоро да го добие тоа оружје, кое има дострел од околу 1.600 километри. „И на Соединетите Држави им требаат томахавки“, рече Трамп. „Ги имаме многу, но ни требаат и нам. Не можеме да ја исцрпиме сопствената земја“.
Тој исто така рече дека му ја споменал на Путин можноста Украина да добие томахавки. „Го прашав: Дали би ви пречело ако им дадам неколку илјади томахавки на вашите противници?“, им рече Трамп на новинарите, додавајќи дека на Путин „не му се допаднала идејата“.
Зеленски со месеци бара оружје што ќе им овозможи на украинските сили да напаѓаат длабоко на руска територија и да погодуваат клучни воени, енергетски и инфраструктурни цели. Украинскиот претседател вели дека ваквите напади ќе го принудат Путин посериозно да ги сфати повиците на Трамп за директни разговори за завршување на војната.
Но Путин, според неговиот советник за надворешна политика Јуриј Ушаков, го предупредил Трамп за време на повикот дека снабдувањето на Киев со томахавки „не само што нема да ја промени ситуацијата на бојното поле, туку ќе предизвика и сериозна штета на односите меѓу нашите земји“.
Денешната средба ќе биде четврта меѓу Трамп и Зеленски откако републиканскиот претседател се врати во Белата куќа во јануари, а втора за помалку од еден месец.
