Реакторите ќе бидат изградени под надзор на Меѓународната агенција за атомска енергија (МААЕ), нагласи министерот во четвртокот на форумот за нуклеарна енергија во Москва.
„Да, ние сме многу амбициозни, но тоа е многу важно за нас, всушност е многу важно за целиот африкански континент“, изјави Абарчи.
На крајот на јули, руската државна компанија за нуклеарна енергија Росатом потпиша меморандум за разбирање со Министерството за енергетика на Нигер, кој предвидува соработка во областа на нуклеарната енергија и нуклеарната технологија, за време на посетата на рускиот министер за енергетика Сергеј Цивилев на Нијамеј.
„Нашата задача не е ограничена само на екстракција на ураниум, мораме да изградиме цел систем за развој на нуклеарна енергија за потребите на Нигер во време на мир. Тоа вклучува изградба на капацитети за производство на електрична енергија за секој граѓанин да има пристап до електрична енергија и соработка во областа на нуклеарната медицина“, рече Цивилев во таа пригода.
„Се договоривме и за заедничка обука на специјалисти во таа област“, додаде рускиот министер.
Нигер внимателно го следи развојот на реактори со мал и среден капацитет, нагласи министерот Абарчи во таа пригода.
Во четврток, Нигер предложи соработка со Русија во развојот на наоѓалишта на ураниум.
„Ве молам, ајде заедно да ги развиваме нашите наоѓалишта на ураниум“, рече нигерискиот министер.
Предлозите се „исклучително интересни“, изјави шефот на Росатом, Алексеј Лихачев.
Минатата година Нигер се најде на осмото место на светското рангирање на производители на ураниум, Ројтерс се повикува на податоци од Светската асоцијација за нуклеарна енергија.
Наслагите на ураниум во Нигер се значајни, особено во северните региони, каде што надминуваат 5.000 тони, објави руската новинска агенција Интерфакс.
Русија во четврток, одделно, потпиша документ со Етиопија во кој се повикува на развој на планови и изградба на нуклеарна централа, пренесува руската новинска агенција РИА, цитирајќи го Росатом.
Планот за развој и изградба на нуклеарната централа беше потпишан на нуклеарниот форум од страна на директорот на Росатом, Лихачев и извршниот директор на Етиопија Електрик, Ашебир Балча.
Според документот, компаниите се согласиле да развијат детален план за изградба и распоред за техничка и економска основа на проектот, како и да склучат меѓувладин договор.
Договорот предвидува обука на работниците за идната нуклеарна централа и развој на нуклеарниот сектор, наведува Ројтерс.
Јужна Африка во моментов е единствената африканска земја со нуклеарна централа. Египет гради реактори, а изградба предложија и Гана, Алжир, Кенија, Мароко, Нигерија, Руанда и Судан.
