Кирк беше убиен минатата среда за време на настап на Универзитетот Јута Вали. А за убиството е обвинет Тајлер Робинсон. Сепак, на социјалните мрежи се проширија бројни теории на заговор, вклучувајќи ја и онаа дека израелската разузнавачка служба Мосад стои зад убиството.
„Јозеф Гебелс, нацистичкиот министер за пропаганда, кажа дека колку е поголема лагата, толку побрзо ќе се шири. Некој измисли монструозна голема лага, дека Израел имал некаква врска со ужасното убиство на Чарли Кирк. Ова е лудо, лажно и скандалозно“, кажа Нетанјаху.
„Чарли Кирк беше гигант, талент што се случува еднаш во еден век. Тој ја бранеше слободата, Америка и нашата заедничка јудео-христијанска цивилизација. Чарли го сакаше Израел, го сакаше еврејскиот народ, ми го кажа тоа во писмо што ми го испрати пред само неколку месеци“, додаде тој.
Изјавата на Нетанјаху дојде откако некои истакнати членови на движењето МАГА (Да ја направиме Америка повторно голема) изјавија дека Кирк приватно бил многу покритичен кон израелската влада на Нетанјаху отколку што јавно покажувал.
Израел се соочува со растечка криза на јавна поддршка како што се интензивира војната во Газа, а членовите на движењето МАГА отворено ги критикуваат израелските тактики. Поранешниот водител Такер Карлсон во својата емисија кажа дека Кирк „не го сакал Биби Нетанјаху“ и бил „згрозен“ од она што се случувало во Газа.
