Планот што Белата куќа го објави денеска содржи процес чекор-по-чекор за завршување на војната и управување со Газа во иднина – а првично Трамп ќе претседава со „мировен одбор“ за енклавата.
„Ако Хамас го отфрли договорот, Биби, ќе имаш целосна поддршка од нас да го направиш она што мораш да го направиш“, рече Трамп, нарекувајќи го Нетанјаху со неговиот прекар.
Трамп тврдеше дека Нетанјаху „сфаќа дека е време“ да ѝ се стави крај на војната. „Мораме да го убедиме Хамас, но мислам дека ќе можеме да го направиме тоа“, рече Трамп, повикувајќи ги арапските и муслиманските лидери да помогнат во спроведувањето на договорот.
Трамп зборуваше речиси половина час во почетокот на прес-конференцијата пред да се сврти кон Нетанјаху и да му дозволи да зборува. „Го поддржувам вашиот план за завршување на војната во Газа, со што се постигнуваат нашите воени цели“, рече Нетанјаху.
Во ажурираниот мировен план објавен од Белата куќа денеска се споменува технократска влада составена од Палестинци, која ќе биде надгледувана од „одбор за мир“ предводен од Трамп, а во кој ќе биде вклучен и поранешниот британски премиер Тони Блер.
Долгорочно, планот предвидува Палестинската самоуправа (ПА) да ја преземе контролата врз Газа и ја остава отворена можноста за палестинска држава. Трамп за време на прес-конференцијата истакна дека Нетанјаху бил „јасен во своето противење на палестинска држава“.
И Израел и арапските земји бараат измени во текстот во последните неколку дена, со прашања како што се демилитаризацијата на Хамас и вклучувањето на Палестинската управа во идното управување со Газа како точки на сопнување.
Нетанјаху рече дека од Израел ќе се бара само да направи „скромно повлекување“ откако ќе се потпише договорот пред да бидат ослободени сите преостанати заложници.
Доколку Хамас не се согласи со договорот или не го спроведе, „ние ќе ја завршиме работата“, рече тој.
Коментарите на Нетанјаху се чинеа во голема мера наменети за смирување на сопствената домашна публика, особено на тврдокорните во неговата коалиција, вели Аксиос.
Во планот што Белата куќа го објави за време на состанокот на Трамп и Нетанјаху се повикува војната да заврши и израелските сили да се повлечат „до договорената линија“, а преостанатите заложници потоа да бидат ослободени во рок од 72 часа. Израел, исто така, ќе ослободи стотици палестински затвореници што ги држи во притвор.
„Членовите на Хамас што ќе се обврзат на мирен соживот и ќе го деактивираат своето оружје ќе добијат амнестија“ и ќе им биде дозволено да ја напуштат Газа доколку сакаат, според соопштението. Хамас нема да има никаква улога во управувањето со енклавата.
Ќе има „процес на демилитаризација“ во Газа и САД ќе „соработуваат со арапски и со меѓународни партнери“ за да развијат привремени меѓународни безбедносни сили, според планот.
Помошта за Газа ќе биде значително зголемена, меѓу другото и преку ОН. Во планот на Белата куќа, исто така, се споменува „план на Трамп за економски развој“ за Газа.
Трамп во неделата рече за Аксиос дека арапските држави стојат зад неговиот план, а „Хамас доаѓа со нив“. Тој, исто така, рече дека Нетанјаху е согласен, иако јавните коментари на израелскиот премиер беа многу помалку дефинитивни.
Израелски претставници рекоа за Аксиос дека јазот меѓу САД и Израел значително се намалил за време на долгиот состанок во неделата помеѓу Нетанјаху, претставникот на Белата куќа, Стив Виткоф, и зетот на Трамп, Џаред Кушнер.
Нетанјаху денеска му се јавил на катарскиот премиер Мохамед бин Абдулрахман Ал Тани за време на средбата со Трамп и се извинил за прекршувањето на катарскиот суверенитет во неодамнешниот напад на Израел врз Доха.
Извинувањето на Израел за нападот беше клучен услов на Катар за продолжување на посредништвото со Хамас. Трамп се чул со емирот на Катар пред Нетанјаху да дојде во Белата куќа.
Портпаролката Каролин Ливит денеска на брифинг со новинарите рече: „Претседателот знае и верува дека неговиот план за завршување на војната е најдобриот што ќе го добијат страните. Двете страни ќе излезат до некоја мера незадоволни. Претседателот верува во својот план и сака војната да заврши“.
Многумина во Белата куќа досега го гледаа Нетанјаху како најголема пречка за мирот во Газа, вели Аксиос.
„Сите – мислам баш сите – се разгневени од Биби“, рекол еден советник на Трамп за Аксиос нарекувајќи го Нетанјаху со прекарот.
Американските претставници рекоа дека Трамп е подготвен јавно да ги раскине врските со Нетанјаху околу Газа ако тој не го поддржи планот.
