Се очекува и Велика Британија да придонесе во мисијата „Источен стражар“, која постепено ќе се проширува од Арктикот на север до Црно и Средоземно Море на југ, заради подобро справување со руските дронови и ракети.
Генералниот секретар на НАТО, Марк Руте, изјави: „Покрај потрадиционалните воени капацитети, овој потфат ќе содржи и елементи дизајнирани да одговорат на посебните предизвици поврзани со користењето дронови.“
Во раните утрински часови во средата, 21 руски дрон, за кои се смета дека биле невооружени мамци, ја преминаа границата со Полска. Само три или четири беа соборени, а еден дрон прелета 260 километри во земјата, принудувајќи да се затворат четири аеродроми.
Во тоа време Доналд Трамп изјави дека упадот „можело да биде грешка“, но додаде: „Сепак, јас не сум среќен со ништо од оваа ситуација.“
Полските лидери беа поодлучни, вели Гардијан. Доналд Туск, премиерот на земјата, објави на социјалните мрежи на англиски: „Сакаме нападот со дронови врз Полска да бил грешка. Но не беше. И ние тоа го знаеме.“
Руте, сепак, остана воздржан. Тој во петокот изјави дека „е во тек процена во НАТО за настаните во средата“, но истакна дека „без разлика дали акциите на Русија биле намерни или не, Русија го наруши воздушниот простор на НАТО“, што наложува одговор.
„Непромисленоста на Русија во воздухот долж нашата источна граница се зачестува“, додаде Руте. „Се забележаа дронови што го нарушија нашиот воздушен простор во Романија, Естонија, Латвија и Литванија – намерно или не, тоа е опасно и неприфатливо.“
Покрај него стоеше највисокиот воен началник на НАТО, генералот Алексус Гринкевич, кој изјави дека НАТО спровел „многу успешна операција“ со пресретнување на дроновите со борбени авиони Ф-35 од Холандија – но додаде: „Секогаш нешто учиме на брифингот.“
Американскиот командант посочи дека бројот на руските дронови покренува прашања. „Размерот на упадот“ беше „очигледно поголем од претходните упади што сме ги имале“ и „придонесувањето на дополнителни ресурси за овој проблем ќе помогне во неговото решавање.“
Данска ќе придонесе со два авиони Ф-16 и фрегата за противвоздушна одбрана, Франција со три борбени авиони рафал, а Германија со четири тајфуни. Велика Британија „исто така ја изразила својата подготвеност да го поддржи овој потфат“, рекле од НАТО.
Русија, во меѓувреме, соопшти дека мировните преговори се во застој. Дмитриј Песков, портпаролот на Владимир Путин, изјави за новинарите: „Нашите преговарачи имаат можност да комуницираат преку каналите. Но за сега, веројатно е поточно да се зборува за пауза.“
