Адвокатите на 1.353 лица кои тврдат дека претрпеле злоставување од страна на локалните католички свештеници постигнале спогодба по неколкумесечни преговори со надбискупијата. Договорот става крај на четвртвековниот судски спор против најголемата надбискупија во САД.
Со повеќе од пет милиони редовни членови и неделни литургии кои се слават на 32 јазици, надбискупијата во Лос Анџелес е бројно најголемата и етнички најразновидна надбискупија во САД.
Според адвокатите на жртвите, спогодбата остава само неколку нерешени тужби против црквата во Лос Анџелес.
Надбискупијата претходно исплати 660 милиони долари на околу 500 жртви во 2007 година, така што со оваа спогодба вкупната исплата ќе изнесува повеќе од 1,5 милијарди долари. Плаќањата се очекува да бидат извршени во 2025 и 2026 година.
„Преживеаните страдаа со децении по злоставувањето, а десетици од злоставуваните починаа. Тие стареат, а и многумина од оние кои знаат за злоставувањата во црквата се исто така стари. Време беше да се реши“, рече адвокатот Морган Стјуарт, кој ги водеше преговорите за спогодбата.
Надбискупот Хозе Х. Гомез изрази жалење за злоставувањата при објавувањето на спогодбата.
„Жал ми е за секој од овие инциденти, од дното на моето срце. Се надевам дека ова ќе обезбеди одредена мерка на исцелување за она што го преживеале овие мажи и жени“, рече тој.
Тој истакна дека надбискупијата на жртвите ќе им плаќа од парични резерви, инвестиции, заеми и придонеси од други верски организации наведени во тужбите. Плаќањата нема да влијаат на мисијата на надбискупијата „да им служи на сиромашните и ранливите во нашите заедници“, рече Гомез.
Во правните документи, епархиските и полициските записи во изминатите неколку децении, повеќе од 300 свештеници кои работеле во надбискупијата во Лос Анџелес се обвинети за сексуална злоупотреба на малолетници.
